Berlin iqtisodiy prognozni pasaytirdi va retsessiyani kutmoqda

Germaniya federal hukumati joriy yil uchun iqtisodiy prognozini o‘zgartirdi va dastlabki taxminlardan farqli o‘laroq, endi retsessiya davom etishini kutmoqda. 9 oktyabr, chorshanba kuni e’lon qilingan rasmiy prognoz 2024 yil oxiriga borib Germaniya yalpi ichki mahsuloti 0,2 foizga qisqarishini ko‘rsatmoqda.

Shunday qilib, bu yil uchun prognoz avvalgisiga nisbatan sezilarli darajada yomonlashdi, dedi Germaniya iqtisodiyot vaziri Robert Habek Berlinda. Bahorda Germaniya hukumati 0,3 foizlik iqtisodiy o‘sishni kutgan edi.

Buning sababi iste’mol talabining zaif o‘sishi, shuningdek, yuqori foiz stavkalari va beqaror geosiyosiy vaziyat tufayli kompaniyalarning past investitsion faolligi, deya ma’lum qildi hukumat.

Kelgusi yillar uchun prognoz biroz yaxshilanadi

2025 yilda iqtisodiyotning tiklanishi kutilmoqda, kelgusi yil uchun iqtisodiy prognoz biroz yaxshilandi. Hukumat iqtisodiyotning bir necha oy oldin 1,0 foiz o‘rniga 1,1 foizga o‘sishini kutmoqda.

Optimistik ssenariy iqtisodiy o‘sishni jonlantirish bo‘yicha yaqinda qabul qilingan chora-tadbirlar to‘plamining jadal amalga oshirilishi oqibatlaridan kelib chiqadi, investitsiyalar kiritayotgan kompaniyalar uchun soliq imtiyozlari, mehnat bozoriga keksa va xorijiy ishchilarni jalb qilish, byurokratiyani kamaytirish va kompaniyalar uchun energiya narxini pasaytirish shular jumlasidan. Bundan tashqari, hukumat nemis sanoat mahsulotlariga eksport talabining tiklanishiga umid qilmoqda, bu esa yana ko‘proq sarmoya kiritish imkonini beradi.

Yetakchi iqtisodiy institutlar retsessiyani prognoz qilmoqda

Joriy yil uchun rasmiy prognozning qisqarishi ajablanarli emas, chunki Germaniyaning yetakchi iqtisodiy institutlari sentabr oyi oxirida Germaniya iqtisodiyoti bu yil biroz qisqarishini kutayotganliklarini bildirgan. YaIMning 0,1 foizga biroz o‘sishi o‘rniga, ular 0,1 foizlik iqtisodiy qisqarishni taxmin qildi.

DIW, IWH, IfW, ifo va RWI institutlari tomonidan tayyorlangan iqtisodiyot holatining qo‘shma tahlili rasmiy prognoz uchun asos bo‘lib xizmat qiladi, bundan, o‘z navbatida, soliq tushumlari prognozi tuziladi.