Livan va Isroil bir-birini sulhni buzganlikda aybladi

Livandagi «Hizbulloh» harakati 2 dekabr, dushanba kuni Isroil armiyasi pozitsiyalariga «o‘zini-o‘zi mudofaa qilish uchun ogohlantiruvchi zarba» berganini ma’lum qildi. Unda aytilishicha, Isroil Livanga havo hujumlari va o‘q uzish orqali o‘t ochishni to‘xtatish kelishuvini buzmoqda.

Isroil harbiylariga ko‘ra, «Hizbulloh»dan ikkita raketa uchirilgan, biroq qurbonlar yo‘q. Isroil bosh vaziri Binyamin Netanyahu zarbaga «qat’iy javob» berilishiga va’da berdi.

Avvalroq Livan rasmiylari Isroil qo‘shinlari bir necha aholi punktlarini o‘qqa tutgani, natijada kamida ikki kishi halok bo‘lgani haqida xabar bergan edi.

Isroil mudofaa kuchlari (TSAHAL) da’vo qilishicha, harbiy mashinalarga «Hizbulloh» harbiy infratuzilmasi yaqinida, Bekaa vodiysi va Suriya bilan chegara yaqinida hujum qilingan. Isroil harbiylari hujumlardan birida livanlik askar yaralanganini tan oldi va voqea o‘rganilayotganini aytdi.

Livan parlamenti spikeri Nabih Berrining aytishicha, Bayrut hozirgacha Isroil tomonidan kamida 54 ta qoidabuzarlikni qayd etgan.

Ayni paytda Isroil tashqi ishlar vaziri Gideon Saar mamlakati o‘t ochishni to‘xtatish kelishuvini buzgani haqidagi xabarlarni rad etib, «Hizbulloh»ni Litani daryosidan janubga qurol va kuchlarni olib o‘tishda aybladi.

30 noyabr, shanba kuni TSAHAL Isroil harbiy-havo kuchlari Suriyadan Livanga qurol olib o‘tishda faol foydalanilgani taxmin qilinayotgan Suriya va Livan o‘rtasidagi chegara o‘tish joylariga tutashgan «Hizbulloh» harbiy infratuzilma obektlariga «razvedka zarbasi» yo‘llagani haqida xabar bergan edi.

UNRWA G‘azo sektoriga insonparvarlik yordami yetkazib berishni to‘xtatdi

Birlashgan Millatlar Tashkilotining Falastinlik qochqinlarga yordam ko‘rsatish agentligi (UNRWA) o‘g‘irlik va transportni olib qochish holatlari ko‘paygani sababli G‘azo sektoriga insonparvarlik yordami yetkazib berishni to‘xtatishga qaror qildi. UNRWA «qiyin qaror»ni 1 dekabr kuni e’lon qildi.

Agentlik ma’lumotlariga ko‘ra, 16 noyabr kuni gumanitar yordam olib ketayotgan yuk mashinalari karvoni qurolli to‘dalar tomonidan olib qochilgan. 30 noyabr kuni ham xuddi shunday hodisa yuz berdi: bir nechta oziq-ovqat tashuvchi mashinalar olib qochildi. «Gumanitar yordam xodimlari va yuklarini himoya etish mas’uliyati okkupatsiya qilayotgan davlat sifatida Isroil zimmasida. Ular G‘azo sektoriga yordamning xavfsiz oqimini ta’minlashi kerak», — deya ta’kidlaydi UNRWA.