FTB rahbari Rey Tramp inauguratsiyasigacha o‘z lavozimini tark etadi

AQSh Federal tergovlar byurosi (FTB) direktori Kristofer Rey AQSh prezidenti Jo Baydenning vakolat muddati tugagach, iste’foga chiqish niyatida. Bu haqda 11 dekabr, chorshanba kuni Vashingtonda AQSh Adliya vazirligi ma’lum qildi.

Bosh prokuror Merrik Garlend Rey AQShning har ikki prezidenti davrida «o‘z mamlakatiga halollik va mahorat bilan xizmat qildi» dedi va u FTB direktori lavozimida ishlaganida «FTB mustaqilligini jinoiy tergovlarni olib borishda nomaqbul ta’sirlardan himoya qilish» uchun mas’ul bo‘lganini ta’kidladi. Bu mustaqillik, dedi Garlend, «qonun ustuvorligini ta’minlashda markaziy o‘rin tutadi».

Qo‘shma Shtatlar qonunlariga ko‘ra, FTB direktori agentlikni siyosiy ta’sirdan himoya qilish uchun o‘n yil davomida o‘z lavozimini egallashi kerak.

FTB yangi direktori - Trampning o‘ta o‘ng tarafdori

AQShning saylangan prezidenti Donald Tramp bu qarorni olqishladi va Kristofer Reyning vakolat muddati tugashiga hali uch yil qolganini inobatga olib, uning qadamini «saxiylik» deb atadi. Biroq u allaqachon Milliy razvedka direktorining sobiq maslahatchisi va Trampning birinchi muddatida mudofaa vaziri shtab boshlig‘i bo‘lgan 44 yoshli Kesh Patelni FTBning yangi rahbari etib tayinlash niyati to‘g‘risida ma’lum qilgan.

Patel avvalroq FTBni razvedka funksiyalaridan mahrum etish va uning safini Trampning kun tartibini qo‘llab-quvvatlashdan bosh tortgan barcha xodimlardan tozalash tarafdori edi. U 2021 yil yanvarida Kapitoliyga bostirib kirishga oid tergov doirasida so‘roq qilingan. Bundan tashqari, Kesh Patel o‘ta o‘ng «chuqur davlat» fitna nazariyasi tarafdori bo‘lib, bu hukumat amaldorlari Trampning birinchi muddatida uning rejalariga qarshi siyosiy maqsadlarda harakat qilganini nazarda tutadi, deya ta’kidlaydi AFP. Patelning so‘zlariga ko‘ra, Rey «Amerika muvaffaqiyati va kelajagi bo‘yicha sabotaj uyushtirish» uchun «hamma narsani qilgan».