26 dekabr kuni Nukus voqealari bo‘yicha tuzilgan komissiya axboroti Oliy Majlisga taqdim etildi. Ma’lum qilinishicha, Oliy Majlis palatalari kengashlarining 2022 yil 15 iyuldagi qo‘shma qarori bilan Ombudsman Feruza Eshmatova boshchiligida 14 nafar deputat, senator, nodavlat tashkilotlar va jamoatchilik vakillaridan tashkil topgan komissiyaning Qoraqalpog‘istonda ro‘y bergan voqealar yuzasidan axboroti Parlament palatalari kengashlari qo‘shma yig‘ilishida ko‘rib chiqilgan.
Komissiya Qoraqalpog‘istonda yuz bergan voqealarning kelib chiqish sabablari, xronologiyasi va oqibatlari, ommaviy tartibsizliklarni bartaraf etishda davlat idoralari va huquq-tartibot organlarining harakatlariga baho bergan. Shuningdek, voqealar ishtirokchilariga nisbatan sud majlislarini kuzatib, 30 nafar sudlanuvchi komissiya iltimosiga ko‘ra sud zalidan ozod etilgan. «Sudlanuvchilar saqlanayotgan tergov hibsxonalariga monitoring tashriflarini amalga oshirdi, shuningdek voqealardan keyin Qoraqalpog‘istonda amalga oshirilgan ijtimoiy-iqtisodiy o‘zgarishlarni kuzatib bordi», deyiladi axborotda.
Komissiya faoliyatida fuqarolardan kelib tushgan jami 600 dan ortiq murojaat ijobiy hal etilgan, 50 dan ortiq davlat va nodavlat tashkilotlarga tashrifi davomida 590 nafar xodim, 334 nafar qamoq jazosini o‘tab chiqqan shaxslar bilan suhbatlashilgan.
«Jinoyat ishi doirasida sudgacha qamoqqa olingan jami 168 nafar shaxsning 107 nafari (2 nafar ayol) Komissiya iltimosnomasiga ko‘ra oilasiga qaytarildi. Komissiya BMTning Inson huquqlari bo‘yicha Oliy komissari boshqarmasi, Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi va boshqa xalqaro tashkilotlar bilan hamkorlik qildi, shuningdek xalqaro nohukumat tashkilotlar, ommaviy axborot vositalari bilan muloqotda bo‘lib turdi».
Ma’lum qilinishicha, Qoraqalpog‘istonda yuz bergan voqealarning ishtirokchilaridan 943 nafari huquqbuzarliklar sodir etgani uchun ogohlantirilgan, 6 135 nafariga ma’muriy jarima, 2 639 nafariga ma’muriy qamoq jazosi belgilangan, 61 nafari jinoyatlar sodir etgani aniqlangan.
«Tartibsizliklar natijasida fuqarolar va huquqni muhofaza qiluvchi idoralar xodimlarining og‘ir tan jarohati olishi va halok bo‘lishi, shuningdek, fuqarolar va davlat idoralarining mol-mulkiga katta miqdorda (6,8 mlrd so‘m) moddiy zarar yetgani ma’lum bo‘ldi», deyiladi komissiya xabarida.
Shuningdek, komissiya huquqni muhofaza qiluvchi idoralar tomonidan ommaviy tartibsizliklarni ma’muriy binolardan uzoqlashtirish va tarqatib yuborish, ma’muriy bino va strategik obektlarni egallashga urinishlarni bartaraf etish maqsadida xalqaro amaliyotda qo‘llanadigan vositalar – suv va rangli suyuqlik purkovchi texnika, ko‘zdan yosh oqizuvchi maxsus granatalardan foydalanilganini bildirgan.
