Amazon асосчиси Жефф Безосга тегишли Blue Origin космик компанияси New Glenn орбитал ракетасининг биринчи парвозини амалга оширди, деб хабар беради BBC.
98 метрли ракета маҳаллий вақт билан соат 02:02 да Флорида штатида жойлашган Канаверал бурнидаги космодромдан старт олган. Тахминан 12 дақиқа ўтгач, ракета синов парвозининг асосий мақсади — орбитага чиқишни амалга оширган.
Стартдан 20 дақиқа ўтиб, Blue Origin компанияси New Glenn ракетасининг биринчи поғонасини Атлантика океанидаги платформага қўндира олмаганини маълум қилди.
Аввалроқ New Glenn ракетасининг парвози уч маротаба қолдирилган эди.
Жефф Безоснинг Blue Origin компанияси космосга тижорий парвозларни амалга ошириш бўйича бозорда устун мавқега эга Илон Маскнинг SpaceX компаниясига рақобатчи бўлишга уринмоқда. Иккала компания ҳам космосга кўпроқ сунъий йўлдош, тижорий станциялар учириш ва Ойга мунтазам парвозларни амалга ошириш ниятида.
Баландлиги 98 метрни ташкил этадиган New Glenn ракетаси икки поғонадан иборат. Биринчи поғонаси кўп марталик бўлиб, ундан 25 мартагача фойдаланса бўлади. Ташувчи ракета Ернинг пастки орбитасига 45 тоннагача фойдали юкни, геостационарга эса 13 тонна юкни олиб чиқишга қодир.
