Tramp Vashingtonda American Airlines yo‘lovchi samolyoti va armiya vertolyoti to‘qnashuvi oqibatida hech kim omon qolmaganini ma’lum qildi. Samolyotda 60 yo‘lovchi va ekipajning to‘rt nafar a’zosi, vertolyotda esa uch nafar harbiy bor edi. AQSh prezidenti kun oxirida Oq uydagi brifingda chiqish qilib, Vashingtonda American Airline samolyoti va Black Hawk vertolyoti halokatidan hech kim omon qolmaganini ma’lum qildi. U butun tun davomida keng ko‘lamli qidiruv-qutqaruv amaliyoti o‘tkazilgani, unga barcha mavjud resurslar jalb etilganini bildirgan. «Bu mamlakatimiz poytaxtida va xalqimiz tarixida dahshatli fojia bo‘lgan qorong‘i va og‘riqli kecha edi. Bizni bevaqt tark etgan har bir kishi uchun qayg‘uramiz», — degan Tramp.
Qutqaruvchilar Potomak daryosida aviahalokat qurboni bo‘lgan 40 kishining jasadini hamda bir necha kishining jasad qoldiqlarini aniqladi, ularning ayrimlari sohilga chiqib qolgan, deb xabar bergan CBS telekanali. Telekanal manbasi bu ma’lumotlarni mahalliy vaqt bilan 30 yanvar kuni soat 17:30 da (Toshkent vaqti bilan 31 yanvar kuni soat 03:30) taqdim etgan. Qutqaruvchilar kun botgani tufayli qidiruv ishlarini to‘xtatishgan va keyingi kuni davom ettirishgan. Tergovchilar hisoblashicha, samolyotdan xavfsiz chiqarib olish mumkin bo‘lgan jasadlarning barchasi chiqarib olingan, ammo laynerning hozirda yetib borish qiyin bo‘lgan dum qismida yana bir necha kishining jasad qoldiqlari qolayotgan bo‘lishi mumkin. Tergovchilar ayrim jasadlarni olib chiqishning imkoni bo‘lmasligidan xavfsiramoqda, deya qo‘shimcha qilgan manba.
Halokatga uchragan samolyotning qora qutilari Potomak daryosidagi parchalar orasidan chiqqan. Samolyotning parametrik va ovoz yozish moslamalari 30 yanvar kuni kechqurun topilgan, deb xabar beradi ABC New manbasi. Qora qutilar o‘rganish uchun AQShdagi aviatsiya hodisalarini tekshiruvchi Milliy transport xavfsizlik kengashi laboratoriyasiga yuborilgan. Tashkilotning X ijtimoiy tarmog‘idagi akkauntida bortning qayd etish qurilmalari suratlari joylashtirilgan.
Yo‘lovchi samolyotda Rossiyaning kamida uch fuqarosi bo‘lgan. Bu haqda RF TIV rasmiy vakili Mariya Zaxarova 31 yanvar kuni jurnalistlar uchun o‘tkazilgan brifingda ma’lum qildi. «Elchixonamiz ma’lumotlariga ko‘ra, ushbu samolyot halokati qurbonlarining uch nafarida Rossiya pasporti bo‘lgan. Yana bir kishi, to‘rtinchi shaxsda ham Rossiya fuqaroligi bo‘lgani haqida taxmin bor, bu ma’lumot tekshirilmoqda», — deya Zaxarovaning so‘zlarini keltirgan TASS agentligi. Avvalroq RF elchixonasi Davlat departamentidan Vashingtondagi aviahalokatda halok bo‘lgan rossiyaliklar to‘g‘risidagi ma’lumot kutayotganini xabar qilgandi. Associated Press ma’lumotiga ko‘ra, samolyot yo‘lovchilari orasida amerikaliklardan tashqari Xitoy va Filippin fuqarolari ham bo‘lgan.
