Bloomberg: Tramp ma’muriyati Pasxagacha Ukrainada o‘t ochishni to‘xtatishga erishmoqchi

AQSh prezidenti ma’muriyati yevropalik amaldorlarga Pasxagacha (20 aprel) Ukrainada o‘t ochishni to‘xtatishga erishish rejalashtirilayotganini ma’lum qildi, deb yozadi Bloomberg.

G‘arb amaldorlari keyingi hafta Saudiya Arabistonida AQSh va Rossiya vakillari muzokaralarga tayyorgalikni boshlagan taqdirda ham yuqoridagi muddatda o‘t ochishni to‘xtatishga erishishni «juda ambitsiyali va noreal», deb baholamoqda. Agentlik manbalaridan birining aytishicha, Rossiya—Ukraina urushini yakunlash ehtimoli ko‘proq bo‘lgan muddat — bu yil oxiri hisoblanadi.

Avvalroq «Strana.ua» urushni 100 kun ichida yakunlash rejasini e’lon qilgandi — unda Pasxa kunlarida o‘t ochishni to‘xtatish, Ukraina qurolli kuchlarini Kursk oblastidan olib chiqish hamda 9 maygacha tinchlik deklaratsiyasi tuzilishi ko‘rsatilgan. Ukraina prezidenti ofisi esa materialni «rossiyaliklar tarqatadigan safsata» deb atagan.

Yaqinlashib kelayotgan muzokaralar fonida Yevropa davlatlariga Ukrainaga yirik harbiy yordam paketi ustida ish bolib bormoqda. Bloombergʼga ko‘ra, qo‘llab-quvvatlov bo‘yicha aniq rejalar 2025 yil 23 fevralga qadar — Germaniyada navbatdan tashqari parlament saylovlari tugamagungacha e’lon qilinmaydi.

Donald Tramp 12 fevral kuni Vladimir Putin va Volodimir Zelenskiy bilan telefon orqali muloqot qilib, Rossiya—Ukraina urushini to‘xtatish to‘g‘risidagi muzokaralarni boshlashga kelishib olganini e’lon qildi. Zelenskiy bir necha bor Ukraina ishtirokisiz hech qanaqa tinchlik muzokaralarni bo‘lmasligini ta’kidlagan.