Makron: Fransiya va uning hamkorlari Yevropada xavfsizlik uchun «to‘liq javobgarlikni» o‘z zimmasiga oladi

Fransiya prezidenti Emmanuel Makron Yevropa Ittifoqidagi hamkasblari, shuningdek, Kanada, Islandiya va Norvegiya vakillari bilan Ukrainani qo‘llab-quvvatlash va Yevropada xavfsizlikni ta’minlash masalalari bo‘yicha muzokaralar o‘tkazdi.

Makron so‘zlariga ko‘ra, Fransiya va sheriklarining pozitsiyasi «aniq va yakdil» bo‘lib qolmoqda va ular «Yevropada tinchlik va xavfsizlikni ta’minlash uchun to‘liq mas’uliyatni o‘z zimmasiga oladi». Bundan tashqari, ular Ukrainada «uzoq muddatli va mustahkam tinchlik» tarafdori, ammo buning uchun ishonchli xavfsizlik kafolatlari bo‘lishi kerak.

Makron bularning barchasi Fransiyaning tub manfaatlariga to‘g‘ri kelishi va o‘zi ularning kafolati ekanini ta’kidladi. Shuningdek, u AQSh prezidenti Donald Trampning Rossiya agressiyasiga chek qo‘yish maqsadiga qo‘shilishini ta’kidladi.

Makron urushni tinch yo‘l bilan hal etishning uchta asosiy tamoyilini aytib o‘tdi: Ukrainaning muzokaralarda majburiy ishtirok etishi va uning huquqlarini hurmat qilish, ishonchli kafolatlar bilan uzoq muddatli tinchlikni ta’minlash va Yevropa davlatlarining xavfsizlik muammolarini hisobga olish.

Uning ta’kidlashicha, yig‘ilishda qatnashganlar butun Yevropa uchun ham, Yevropa Ittifoqining har bir mamlakati uchun ham mudofaa va xavfsizlikni ta’minlash uchun sarflanadigan xarajatlarni oshirish zarurligiga ishonch hosil qilgan. Makron «tegishli qarorlar yaqin kunlar va haftalarda qabul qilinadi», deb va’da berdi.