Ilon Mask amerikalik barcha amaldorlardan hisobot talab qildi. Aks holda ular ishdan bo‘shatiladi

AQSh Hukumat samaradorligi departamenti (DOGE) rahbari Ilon Mask barcha davlat xizmatchilari o‘tgan hafta davomida bajargan ishlari to‘g‘risida batafsil ma’lumot berishlari kerakligini ma’lum qildi.

«AQSh prezidenti Donald Trampning ko‘rsatmalariga muvofiq, barcha federal xodimlar yaqin vaqt ichida o‘tgan hafta davomida nima ish qilganliklarini tushuntirishlari talab etilgan elektron xatlarni oladi. Javob qaytarmaslik, iste’foga ketish sifatida baholanadi», — deb yozadi Mask X ijtimoiy tarmog‘idagi sahifasida.

Amaldorlarga yuborilgan xatlarda ulardan «o‘tgan hafta nimaga erishgani bo‘yicha beshta bandni» ko‘rsatish talab etiladi, shu bilan birga, javob yozayotgan xodimlar maxfiy ma’lumotlarni keltirmasligi kerak. Javob 24 fevral kuni AQSh vaqti bilan 23:59 ga qadar yo‘llanishi lozim. Xatlarga javob yozmaslik, iste’fo sifatida baholanishi haqida hech narsa deyilmagan.

Bajarilgan ishlar bo‘yicha qisqa rezyumeni AQSh hukumatidan mustaqil bo‘lgan agentlik — Kadrlar xizmati boshqarmasi so‘ragan. Boshqarma boshlig‘i Maklaurin Pinoverning so‘zlariga ko‘ra, xatlar «Tramp ma’muriyatining samaradorlikni ta’minlash va federal xodimlarning hisobdorligiga erishish yo‘lidagi harakatlari» doirasida yo‘llangan.

Bu turdagi xatlarni barcha idoralar, jumladan, Markaziy razvedka boshqarmasi va Oq uy ham olgan. Shuningdek, elektron xatlar Amerikaning turli davlatlardagi diplomatlariga ham yo‘llangan.

Ayrim idoralar, masalan, Federal tergov byurosi va Adliya vazirligi o‘z xodimlaridan xatlarga javob qaytarishni kechiktirishni so‘ragan.

Ilon Maskning ma’lum qilishicha, federal xizmatlardan «ko‘plab yaxshi javoblar olingan». U xatga birinchi bo‘lib javob qaytarganlarning xizmat lavozimlarini ko‘tarishga chaqirdi.

Amerika davlat xizmatchilari federatsiyasi — minglab federal xizmatchilarni birlashtiruvchi kasaba uyushmalarining ma’lum qilishicha, «butun mamlakat bo‘ylab o‘z a’zolari va federal xizmatchilarning har qanday turdagi noqonuniy ishdan bo‘shatilishi ustidan shikoyat kiritishlarini» ma’lum qildi.

Ilon Mask amaldorlardan bajarilgan ishlar bo‘yicha javob berilishini AQSh prezidenti Donald Tramp 22 fevral kuni DOGE rahbarini ushbu lavozimda «qattiqqo‘l bo‘lishga» chaqirganidan keyin talab qildi.