15 fevral kuni Surxondaryo viloyatining Uzun tumanida mudhish qotillik yuz berdi: noma’lum shaxslar ona va uning ikki farzandini o‘ldirib, jinoyatni yashirish uchun uyiga o‘t qo‘ygan. 10 kundan ko‘proq vaqt o‘tganiga qaramay jinoyat haligacha fosh etilmadi. Kun.uz muxbiri voqea tafsilotlarini o‘rganish maqsadida qotillik sodir etilgan mahallada bo‘ldi.
2025 yil 15 fevral kuni tungi soat 3:00 lar atrofida Uzun tumanining Yangiyo‘l mahallasida noma’lum shaxslar 1982 yilda tug‘ilgan Mahbuba Rajabova xonadonida qotillikka qo‘l urgan. Qotillar dastlab onani, so‘ngra uning farzandini o‘ldirishgan.
Qo‘shni ayolning Kun.uz’ga bildirishicha, marhumaning 3 farzandi bo‘lgan. Ulardan 2 nafari urib o‘ldirilgan, 1 nafari omon qolgan.
Fojiaga marhumaning eri o‘zgalardan katta miqdorda qarzdor bo‘lgani asosiy sabab qilib ko‘rsatilmoqda. Ayolning turmush o‘rtog‘i qarzi sabab 2021 yilda Rossiyaga ketgan. Shundan beri uyiga qaytmagan.
“Rossiyada kimdandir qarz bo‘lganmi, bilmaymiz-da, qarz berganlar jim bo‘lib ketgandi. Hech narsa deb bo‘lmaydi u odamni, bolalarining boshini yedi. Hozir u qamoqda, shu kuni keldi, qarzdorlar janjalsiz ketib qolardi, u opa juda muomalali edi”, deydi Kun.uz muxbiri bilan suhbatlashgan ayol.
Qo‘shni ayolning aytishicha, marhumaning 2017 yilda tug‘ilgan qizi va erning birinchi turmushidan bo‘lgan o‘g‘li halok bo‘lgan. 2016 yilda tug‘ilgan qizi esa shifoxonaga yotqizilgan.
Yangiyo‘l mahallasi raisi Nuriddin Obilovning Kun.uz’ga aytishicha, marhuma Mahbuba Rajabovaning eri Rossiyaga ketmasidan oldin fermer bo‘lib ishlagan. U 2021 yilda fermerlik faoliyatini tugatgan hamda mashinasini sotib, Rossiyaga yo‘l olgan.
“Bu oilaning ko‘chib kelganiga 15 yillar bo‘lyapti. Yaxshi oila edi, qo‘shnilardan ham so‘rashingiz mumkin, biror yomon fikr aytmagan. Ayol maktab o‘qituvchisi edi. Farzandlarini yaxshi tarbiya qilgandi. Eri taxminan 2021 yilda Rossiyaga ketgandi. Bu ikkinchi oilasi. Marhuma ayol erining birinchi turmushidagi farzandini o‘z farzandidek ko‘rib tarbiya qilardi. Mahallaga yordam so‘rab bormagan, g‘ururli ayol edi. Mudhish voqea bo‘lib qoldi, hammamiz shokdamiz”, deydi Obilov.
Raisning ma’lum qilishicha, mahallada 50 yildan buyon bunaqa voqea bo‘lmagan.
