Ruminiyada prezidentlikka sobiq nomzod Jorjyesku hibsga olindi

Noyabr oyida Ruminiya prezidentligi saylovlarida ishtirok etgan o‘ta o‘ng rossiyaparast siyosatchi Kelin Jorjyesku politsiya tomonidan qo‘lga olindi. U o‘zining saylov kampaniyasini noqonuniy moliyalashtirish ishi bo‘yicha so‘roq qilinish uchun Bosh prokuraturaga olib boriladi.

Qayd etilishicha, idora binosida xavfsizlik choralari kuchaytirilgan. Jorjyesku nomzodini qo‘llab-quvvatlagan o‘ng qanot «Ruminlarni birlashtirish alyansi»dan saylangan deputatlar huquq-tartibot idoralari vakillaridan tushuntirish talab qilishlarini bildirdi.

26 fevral kuni Ruminiya Bosh prokuraturasi va politsiyasi konstitutsiyaviy tuzumni buzish hamda saylov kampaniyasini moliyalashtirish manbalari to‘g‘risida yolg‘on ma’lumot berishga oid jinoyat ishi doirasida 40 ga yaqin tintuv o‘tkazgandi. Gumonlanuvchilar orasida harbiy instruktor Xoratsiu Porta ham bor — u Jorjyesku atrofidagi shaxslardan hisoblanadi.

Rossiyaparast siyosatchi Kelin Jorjyesku noyabr oyidagi prezidentlik saylovlarining birinchi turida 23 foiz ovoz bilan g‘alaba qozongan edi, ammo keyinroq Konstitutsiyaviy sud ovoz berish natijalarini bekor qildi. Bunga hukumat tomonidan rumin razvedkasi (SRI) ma’lumotlari ochiqlangani sabab bo‘ldi. Ushbu ma’lumotlarda Jorjyeskuning TikTokʼdagi targ‘iboti uchun Bogdan Peshir ismli ruminiyalik 381 ming dollar to‘lagani keltirilgan.

Prezidentlikka nomzodning o‘zi bir sent ham sarflamaganini bildirgan. SRI, shuningdek, Jorjyesku nomzodining ilgari surilishi ortida Rossiya maxsus xizmatlari turgan bo‘lishi mumkinligini istisno etmagan. 6 dekabr kuni Ruminiya Konstitutsiyaviy sudi saylovlarning birinchi turi natijalarini bekor qildi. Yangi ovoz berish jarayonlari 4 may sanasiga belgilangan.