Ruminiyada rossiyaparast siyosatchi yana saylovda qatnashadi

Rossiyaparast ruminiyalik siyosatchi Kelin Jorjyesku Markaziy saylov komissiyasiga prezidentlik saylovlarida nomzod sifatida ro‘yxatdan o‘tish uchun hujjatlarni topshirdi. Bu haqda 7 mart, juma kuni Ruminiyaning Agerpres axborot agentligi xabar berdi.

Jorjyesku mustaqil nomzod sifatida qatnashmoqda

62 yoshli o‘ta o‘ng siyosatchi rafiqasi bilan birga Markaziy saylov komissiyasiga kelgan. Uning yuzlab tarafdorlari bino tashqarisida to‘planishgan. Jorjyesku o‘z nomzodini qo‘yish uchun 324 ming imzo to‘plaganini aytdi. Qonunga ko‘ra, har bir nomzod kamida 200 ming fuqaroning qo‘llab-quvvatlashini ta’minlashi kerak.

Jorjyeskuga imzo to‘plashda Ruminiyaliklarni birlashtirish alyansi (AOR) va Yoshlar partiyasi yordam berdi. Ularning rahbarlari Jorj Simion va Anamariya Gavrilya ham Jorjyeskuni qo‘llab-quvvatlash uchun MSKga kelishdi.

U mustaqil nomzod sifatida ro‘yxatdan o‘tish uchun hujjatlarni topshirdi. Bundan oldin u millatchi AOR a’zosi edi.

Jorjyesku birinchi tur natijalari bekor qilinishi haqida

Ruminiya Konstitutsiyaviy sudi 24 noyabr kuni bo‘lib o‘tgan prezidentlik saylovlarining birinchi bosqichi natijalarini bekor qilgan kunni nazarda tutgan siyosatchi: «2024 yil 6 dekabrda demokratiya o‘ldirildi. Bugun Ruminiya xalqi uni tiriltirdi», dedi. O‘shanda Jorjyesku g‘olib deb e’lon qilindi, unga saylovchilarning 22,94 foizi ovoz berdi.

Ruminiya maxsus xizmatlari Rossiyani saylovlarga, xususan, siyosatchini ijtimoiy tarmoqlarda ommalashtirish kampaniyasi orqali aralashishda aybladi. Ta’kidlanishicha, Rossiya Jorjyeskuni reklama qilish uchun minglab TikTok akkauntlaridan foydalangan. Ruminiya Bosh prokuraturasi natijalarni soxtalashtirish bo‘yicha ish ochdi. Takroriy saylovlar 4 mayga belgilangan. Agar nomzodlardan hech biri 50 foizdan ko‘p ovoz to‘play olmasa, ikkinchi tur 18 may kuni bo‘lib o‘tadi.