IPI "Ozodlik radiosi" va AQShning boshqa ommaviy axborot vositalarini himoya qilib chiqdi

Xalqaro matbuot instituti (IPI) AQSh prezidenti Donald Tramp yettita davlat agentligi, jumladan AQSh Global media agentligi (USAGM) faoliyatini to‘xtatish to‘g‘risidagi farmonni imzolaganidan keyin yopilishi kutilayotgan "Ozod Yevropa/Ozodlik radiosi" va boshqa Amerika ommaviy axborot vositalarini himoya qilib chiqdi. «Ushbu harakat butun dunyo bo‘ylab avtokratlarning imkoniyatlarini kengaytiradi va millionlab muqobil, ishonchli yangiliklar va axborot manbalaridan mahrum qiladi», — deyiladi IPI'ning 17 mart, dushanba kuni bayonotida.

Institut bayonotida ta’kidlanishicha, USAGM tomonidan boshqariladigan «Amerika ovozi», «Ozod Yevropa/Ozodlik radiosi» «sovuq urush davridagi Sovet Ittifoqidan tortib, bugungi kunda Eron, Xitoy va Shimoliy Koreyagacha» avtoritar rejimlarga ega bo‘lgan mamlakatlar uchun muhim axborot manbalari hisoblanadi. «Uchta nashr AQSh Kongressi tomonidan moliyalashtiriladi va statistikaga ko‘ra, butun dunyo bo‘ylab haftasiga 450 million o‘quvchilar, tomoshabinlar va tinglovchilarni qamrab oladi», deb xabar beradi IPI. "Ozod Osiyo radiosi" prezidenti Bay Fang Trampning qarorini «diktatorlar va despotlar uchun mukofot» deb atagan.

IPI AQSh hukumatidan o‘z qarorini bekor qilishni va o‘z ommaviy axborot vositalari va xodimlarining ishini himoya qilishni talab qildi.

Praga Yevropa Ittifoqida "Ozodlik radiosi"ning kelajagini muhokama qilmoqchi

Chexiya hukumati Qo‘shma Shtatlar moliyalashtirishidan mahrum bo‘lgan Pragada joylashgan "Ozod Yevropa/Ozodlik radiosi"ning kelajagini Yevropa Ittifoqida muhokama qilmoqchi. 16 mart kuni Chexiya televideniyesi orqali tashqi ishlar vaziri Yan Lipavskiy: «Bunday eshittirishlarni davom ettirish Yevropa manfaatlariga javob beradi» dedi.

U 17 mart kuni Yevropa Ittifoqining boshqa davlatlaridan kelgan hamkasblari bilan uchrashuvda "Ozodlik radiosi" faoliyatini davom ettirish masalasini ko‘tarishini aytdi. "Ozodlik radiosi" Chexiya va Yevropa uchun nimani anglatishi haqida siyosiy fikr yuritish kerak, dedi Lipavskiy. «Bizning qo‘shnimizda totalitarizm gullab-yashnamasligi bizning manfaatlarimizga mos keladi», deya qo‘shimcha qildi u.