Xorazm viloyatining uchta tumanida hokim o‘zgardi

18 mart kuni Xorazm viloyatining uchta hududi – Hazorasp, Shovot va Honqa tumanlarida hokimlar o‘zgardi.

Xorazm viloyati hokimi Jo‘rabek Rahimov ishtirokida o‘tkazilgan sessiyada Hazorasp tumani hokimi lavozimiga prezident huzuridagi Davlat xizmatini rivojlantirish agentligining Milliy kadrlar zaxirasidan Maqsudbek Hojiyevich Abdullayev nomzodi tavsiya etildi va u hokim lavozimiga tasdiqlandi.

Maqsudbek Abdullayev Tuproqqal’a tumanidagi «NEW BEST STYLE» MChJ ta’sischisi hisoblanadi.

Hazorasp tumaniga 2023 yil fevraldan buyon Zafar Abdirimov hokim edi, uning keyingi faoliyati haqida ma’lumot yo‘q.

Viloyat hokimligi matbuot xizmati xabarida sessiyada Jo‘rabek Rahimov so‘zga chiqib, tumanni ijtimoiy- iqtisodiy rivojlantirish borasida yo‘l qo‘yilgan kamchiliklarni chuqur tahlil qilgani va galdagi ustuvor vazifalar xususida to‘xtalgani qayd etilgan.

Bugun xalq deputatlari Xonqa tuman kengashining navbatdan tashqari sessiyasida ham tashkiliy masala ko‘rib chiqildi. Viloyat hokimi ushbu tuman hokimi lavozimiga Ulug‘bek Jumaniyozovich Davlatov nomzodini tavsiya etgan va muzokaralardan keyin deputatlar nomzodni bir ovozdan ma’qullagan.

Ulug‘bek Davlatov bunga qadar Yangibozor tumani hokimining moliya iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimida ishlab kelayotgandi.

Xonqa tumaniga 2020 yil dekabridan buyon Muradbek Saparbayevich Davlatov hokimlik qilib kelayotgandi.

Bugundan u Shovot tumani hokimi sifatida ish boshladi.

Shovot tumaniga 2023 yil noyabrdan buyon Oybek Xolboyev hokimlik qilib kelayotgandi. Uning keyingi faoliyati haqida hozircha ma’lumot yo‘q.