Hibsga olingan Istanbul meri barcha ayblovlarni rad etdi

Istanbul meri Akrom Imomo‘g‘li ko‘rsatma berish davomida barcha ayblovlarni rad etdi. SZV TV telekanalining ma’lum qilishicha, 22 mart, shanba kuni u sud qarshisida javob beradi.

19 mart kuni Turkiya politsiyasi Istanbul shahri meri Akrom Imomo‘g‘lini hibsga oldi. U korrupsiya va terrorchilar bilan hamkorlik qilishda ayblanmoqda.

«Ko‘rsatma berish jarayoni yakunlandi. Imomo‘g‘li uch soat ko‘rsatma berdi, barcha ayblovlarni rad etdi. Shanba kuni soat 21:00 da u sudga yuborilishi mumkin», — deyiladi xabarda.

Oldinroq Turkiya prezidenti Rajab Toyyib Erdo‘g‘an Akrom Imomo‘g‘lining hibsga olinishiga izoh berib, muxolifatni vaziyatni siyosiylashtirishda ayblagan edi.

Akrom Imomo‘g‘li Jumhuriyat xalq partiyasidan «praymeriz»da (ichki saylov saylovlari) yagona nomzod edi, uni Turkiya prezidentiga asosiy raqib sifatida ko‘rishadi. Merning hibsga olinishi fonida mamlakatda ijtimoiy tarmoqlar cheklandi, turk lirasi tarixiy minimumga qadar quladi. Manbalarga ko‘ra, hukumatning maqsadi — Istanbulni hukmron Adolat va taraqqiyot partiyasi nazorati ostiga qaytarish. Turkiyada ommaviy norozilik namoyishlari davom etmoqda.