Trent yozda «Real»ga o‘tadi

«Liverpul» himoyachisi Trent Aleksander-Arnold 2025 yil 1 iyulda rasman Madridning «Real» klubi a’zosiga aylanadi. Ingliz futbolchisi agentlari «qaymoqranglilar» bilan allaqachon besh yillik shartnoma bo‘yicha kelishib olgan, unga ko‘ra futbolchiga 15 mln yevro maosh to‘lanadi. Bu haqda jurnalist Sasha Tavoleri X ijtimoiy tarmog‘idagi sahifasida xabar bergan.

«Liverpul»da futbolchining yillik maoshi 11 million yevro edi.

Ma’lum qilinishicha, Aleksander-Arnoldga muayyan natijalar uchun mukofot pullari, shuningdek, shartnomaga rozilik bergani uchun bonus ko‘zda tutilgan, bu bonus miqdori transfer qiymatiga teng bo‘ladi. Transfermarkt portalida Trentning transfer narxi 75 mln yevroga baholangan.

Bundan oldinroq Marca jurnalisti Xose Feliks Dias ham Trent Aleksander-Arnold yana bir bor «Liverpul»ning shartnomani yangilash bo‘yicha taklifini rad etganini xabar qilgandi.

«Liverpul» yana bir marta angliyalik himoyachidan rad javobi oldi. Uning «Real»ga o‘tish qarori allaqachon qabul qilingan va buni hech narsa o‘zgartira olmaydi», — deb yozgandi Dias o‘z kolonkasida.

Aleksander-Arnold «Liverpul» tarbiyalanuvchisi hisoblanadi,
u 2016 yil yozidan buyon asosiy jamoa safida o‘ynab keladi. U mersisaydliklar klubi uchun jami 349 o‘yinda maydonga tushib, 22 gol urgan va 87 golga uzatma bergan.