Ovechkin NHLning muntazam chempionatlaridagi gollar bo‘yicha rekordni yangiladi 

6 aprel, yakshanba kuni «Vashington Kepitalz» jamoasining rossiyalik forvardi Aleksandr Ovechkin Milliy hokkey ligasi muntazam chempionatlarida 895-shaybasini «Nyu-York Aylenders»ga qarshi mehmonda kechgan bahsda kiritdi va bu ko‘rsatkich bo‘yicha yangi rekordchiga aylandi. NHL afsonasi Ueyn Gretskiga tegishli avvalgi rekord 26 yil saqlanib turgandi.

Ligadagi 20 yillik faoliyati davomida 39 yoshli Ovechkin faqat bir marta Stenli kubogini qo‘lga kiritdi va shuning uchun NHLdagi umumiy gollar soni bo‘yicha Gretskidan ancha orqada: 967:1016. U liganing pley-off o‘yinlarida kanadalikning 122 ta shaybasi bilan solishtirilganda atigi 72 ta shayba kiritgan. Ovechkin faoliyatining asosiy qismida uning "Vashington" jamoasi muntazam ravishda pley-off bosqichining boshidayoq Stenli kubogi uchun kurashdan chiqqan.

Stenli kubogining to‘rt karra g‘olibi, hozir 64 yoshda bo‘lgan Ueyn Gretski 1979 yildan 1999 yilgacha NHLda o‘ynagan. Faoliyati davomida u NHLda 2857 ochko to‘plagan, 894 gol urgan va 1963 ta shaybaga assistentlik qilgan. Uning eng yaqin ta’qibchisi chexiyalik Yaromir Yagr 1921 ochko to‘pladi. Hozirda faoliyatini davom ettirayotgan hokkeychilar orasida ushbu ko‘rsatkich bo‘yicha birinchi o‘ntalikka 1682 ochko bilan "Pitsburg Pingvinz" jamoasidan 37 yoshli Sidni Krosbi kiradi. Ovechkin hozirda 11-o‘rinda bormoqda: "gol+pas" tizimiga ko‘ra, uning hisobida 1618 ochko bor.