Netflix Amir Temur haqidagi filmni suratga oldi

Ijodkorlarning so‘zlariga ko‘ra, film buyuk sarkardaning yuksalishi haqidagi epik voqeani tarixiy aniqlik va davr muhitiga alohida e’tibor bilan hikoya qiladi.

Foto: Instagram/tamerlanemovie

Netflix striming platformasi Amir Temurning hayoti va hokimiyat sari yo‘li haqida hikoya qiluvchi «So‘nggi fotihning yuksalishi» nomli filmni suratga olish jarayonini yakunladi.

Ijodkorlarning so‘zlariga ko‘ra, film buyuk sarkardaning yuksalishi haqidagi epik voqeani tarixiy aniqlik va davr muhitiga alohida e’tibor bilan hikoya qiladi.

«Biz mintaqaning eng muhim arboblaridan biri yashab, jang qilgan joyda kino tasvirini jonlantirdik. Bu film uchun bebaho», deyiladi xabarda.

Film rejissyori Jyeykob Shvars, ssenariy muallifi Metyu Grin. Amir Temur rolini Kristian Mortensen, amir Husayn rolini Mahesh Jadu, Amir Temurning rafiqasi O‘ljoy Turkon rolini o‘zbek aktrisasi Yulduz Rajabova ijro etgan.

Filmni suratga olish jarayoni 2022 yil oxirida boshlangan va 2024 yil kuzida yakunlangan. Suratga olish ishlari O‘zbekiston va Qozog‘istonda bo‘lib o‘tgan.

Hozir film post-prodyuserlik bosqichida. Premera 2025 yil yozi oxirida kutilmoqda.