Makron G‘azoda o‘t ochishni to‘xtatishga va Ukrainani qo‘llab-quvvatlashga chaqirdi

Fransiya Prezidenti Emmanuel Makron Britaniya parlamenti a’zolari oldida qilgan chiqishida ikki davlat o‘rtasidagi ko‘p qirrali aloqalar, shuningdek, G‘azoda o‘t ochishni to‘xtatishni ta’minlash va Rossiya-Ukraina urushi bo‘yicha muzokaralar haqida gapirdi.

Makron Buyuk Britaniyaga uch kunlik davlat tashrifining birinchi kunida Vestminster saroyida parlamentariylar oldida chiqish qildi.

Fransiya prezidenti urushning Yevropa qit’asiga qaytishi bilan dunyo tartibi har kuni hujumga uchraganini va xalqaro qoidalar beqarorlashtiruvchi kuchlar tomonidan buzilayotganini aytdi. U ittifoqchilarni xalqaro tartibni himoya qilish uchun birgalikda harakat qilishga chaqirdi.

Makron Ukraina noqonuniy hujum qurboni bo‘lganini ta’kidlab, Buyuk Britaniyaning Ikkinchi jahon urushida Fransiyani qo‘llab-quvvatlaganiga ishora qilib, hozirda Ukrainaga ham xuddi shunday yordam ko‘rsatilayotganini ta’kidladi.

«Rossiya Ukrainadagi har bir olg‘a siljishi bilan tahdid barchamizga yaqinlashmoqda», dedi u. Makron Yevropa hech qachon Ukrainani yolg‘iz qoldirmasligini ta’kidladi.

Makron o‘z nutqida Isroil tomonidan shiddatli hujum va blokada ostida bo‘lgan G‘azo sektoridagi sulh muzokaralariga ham to‘xtaldi.

Uning ta’kidlashicha, Fransiya Yaqin Sharqda tinchlik uchun boshqa davlatlar bilan hamkorlik qiladi.