UNIAN xabariga koʻra, tegishli bayonot Kiyevda boʻlib oʻtayotgan «Koʻngillilar koalitsiyasi» sammiti yigʻilishi avvalida yangragan.

Kiyevga shaxsan tashrif buyurgan Byornemning taʼkidlashicha, Buyuk Britaniya 2023-yildayoq Ukrainaga uzoq masofali qurollarni topshirgan birinchi davlat boʻlgan edi.

«Endi Volodimir Zelenskiy Ukrainaning oʻzi bu imkoniyatlarni yarata olishi uchun bizdan Storm Shadow texnologiyasini taqdim etishimizni soʻradi. Bugun men ushbu soʻrovni maʼqullaganimni hamda Britaniya va Fransiya sanoatiga murojaat qilganimni mamnuniyat bilan tasdiqlayman. Shuningdek, prezident Makron va uning hamkasblariga endi Ukraina bilan ushbu salohiyatni rivojlantirish ustida ish olib borishimiz uchun minnatdorchilik bildiramiz», – deb taʼkidladi Byornem.

Byornem qayd etganidek, ayni paytda Rossiyaning urush olib borish imkoniyatlari tugab borayotgani ayon boʻlmoqda.

«Shu sababli Putin hozir Ukraina tinch aholisiga qarshi ballistik raketalarni qoʻllab, terror kampaniyasi orqali gʻalaba qozonishga umid qilmoqda. Yaqinda bolalar shifoxonasi va bolalar bogʻchasi zarbaga uchraganini koʻrdik. Bu hech qachon gʻalaba uchun asos boʻla olmaydi va biz buni bugun aniq aytishimiz kerak», – dedi Byornem.

Shu bois, Britaniya bosh vazirining aytishicha, Ukrainaning ehtiyojlarini qondirish uchun «havo hujumidan mudofaa vositalarining oʻz zaxiralarini chuqur ishga solish» yoʻlida ittifoqchilar, jumladan, «Koʻngillilar koalitsiyasi»dan tashqaridagilar bilan ham birgalikda barcha choralarni koʻrish va hamjihatlikda ishlash zarur.

Ukraina prezidenti Volodimir Zelenskiy qayd etganidek, Buyuk Britaniya Ukraina mudofaasi va Yevropa xavfsizligini qoʻllab-quvvatlashda haqiqiy yetakchi boʻlib qolmoqda. U Buyuk Britaniya va Fransiya vakillariga minnatdorchilik bildirib, qabul qilingan qarorlar Ukraina armiyasini mustahkamlashini taʼkidladi.

Shuningdek, Ukraina prezidenti mamlakat havo hujumidan mudofaa tizimining «qishki paketi»ni olishi uchun saʼy-harakatlarni kuchaytirish lozimligini aytdi: «Bizga Patriot raketalarining qishki paketi kerak. Bu paketga ega boʻlamiz deb umid qilamiz. Qish va sovuq oylar uchun bizga kamida 300 ta Patriot raketasi zarur».