Ukraina prezidenti Volodimir Zelenskiy 23-avgust kuni Fransiya prezidenti Emmanuel Makron bilan muloqotidan soʻng mamlakat havo hujumidan mudofaa tizimini kuchaytirish boʻyicha yangi rejalarni maʼlum qildi.
Zelenskiyning aytishicha, Ukraina Fransiyadan PVO uchun yangi radarlar olishni kutmoqda. Ularni kuzda yetkazib berish rejalashtirilgan.
«RBK-Ukraina» maʼlumotiga koʻra, Kiyev kuzda yana bitta SAMP/T zenit-raketa majmuasini olishi kutilmoqda. Ishlab chiqarish imkoniyatlariga qarab, Ukrainaga ikkinchi shunday tizim ham yetkazib berilishi mumkin.
Bundan tashqari, Zelenskiy yil oxirigacha Ukraina hududida Fransiya qurollarining uch turini ishlab chiqarish uchun litsenziyalar olinishiga umid qilayotganini bildirdi.
Zelenskiy 600 ta PAC-2 raketasi haqida gapirdi
Ukraina rahbari Germaniya kansleri Fridrix Mers bilan Patriot zenit-raketa majmualari uchun PAC-2 turidagi 600 ta raketa yetkazib berish masalasida kelishuvga erishganini ham maʼlum qildi.
Zelenskiyga koʻra, ushbu raketalarni 2027–2028-yillar davomida yetkazib berish rejalashtirilgan.
Biroq Germaniya tomonidan hozircha bu miqdordagi raketalar yetkazib berilishi rasman tasdiqlangani haqida xabar berilmagan.
Germaniya tashqi ishlar vaziri Yoxann Vadeful Kiyevga tashrifi chogʻida mamlakat mudofaa vaziri Boris Pistorius va mutaxassislar mavjud zaxiralarni oʻrganib, Ukrainaga qoʻshimcha vositalar berish imkoniyatini baholashi kerakligini aytdi.
Vadeful, shuningdek, Germaniya Ukrainaga qoʻshimcha 50 mln yevro miqdorida humanitar yordam ajratishini maʼlum qildi. U Kiyevning havo mudofaasini kuchaytirish uchun qoʻshimcha mablagʻ ajratilishi mumkinligini ham istisno qilmadi.
Germaniya tashqi ishlar vaziri ittifoqchilarni Ukrainaga Patriot tizimlari uchun qoʻshimcha raketalar berishga koʻndirish boʻyicha saʼy-harakatlarni davom ettirishini taʼkidladi.
Daniya ham ittifoqchilar bilan muzokara olib bormoqda
Daniya bosh vaziri Mette Frederiksen Kiyevda Patriot raketalarini topish va Ukrainaga yetkazish masalasini «murakkab siyosiy ish» deb atadi.
Uning soʻzlariga koʻra, Boltiqboʻyi va Skandinaviya mamlakatlari rahbarlari hamda Zelenskiy bilan Yevropa NATO ittifoqchilariga siyosiy taʼsir oʻtkazish va Ukraina uchun qoʻshimcha raketalar topish imkoniyatlari muhokama qilingan.
Ukrainada Patriot raketalari tanqisligi aytilmoqda
Avvalroq CNN ukrainalik rasmiylarga tayanib, mamlakatda AQShning Patriot havo mudofaa majmualari uchun raketa-tutqichlar zaxirasi deyarli tugaganini xabar qilgan edi.
Politico ham Ukrainada, birinchi navbatda, PAC-3 va PAC-2 raketalari yetishmayotganini yozgan. Ushbu raketalar Rossiya ballistik raketalariga qarshi kurashda Ukraina ixtiyoridagi muhim havo mudofaa vositalari qatoriga kiradi.
