Ukraina prezidenti Volodimir Zelenskiy Ukraina milliy panteonini tashkil etish toʻgʻrisidagi qonunni imzoladi. Ukraina Oliy radasi saytidagi maʼlumotga koʻra, hujjat 22-avgust kuni davlat rahbari tomonidan imzolangan.
«Ukraina panteoni albatta boʻladi. Qahramonlarimiz kim ekanini faqat ukrainaliklarning oʻzi hal qiladi», - dedi Zelenskiy.
Qonun loyihasi 1-iyul kuni Oliy radada birinchi oʻqishda 290 deputat tomonidan qoʻllab-quvvatlangan edi. Keyinchalik hujjatni toʻliq qabul qilish uchun 287 deputat ovoz bergan.
Kiyevda yagona milliy makon yaratiladi
Qonun Kiyevda Ukraina davlatchiligi anʼanalarining uzluksizligini ifodalovchi yagona milliy makon tashkil etishni nazarda tutadi.
OAV maʼlumotiga koʻra, panteon Kiyev Rusidan tortib hozirgi Ukrainagacha boʻlgan davlatchilik tarixini aks ettirishi rejalashtirilgan.
Memorial majmua Ukrainaning taniqli tarixiy shaxslarini qayta dafn etish joyi boʻlishi koʻzda tutilgan. Qoldiqlarini mamlakatga qaytarish imkoni boʻlmagan shaxslar uchun esa ramziy qabrlar - kenotaflar oʻrnatilishi mumkin.
Shu bilan birga, panteon tarixiy xotirani saqlash, vatanparvarlik tarbiyasi va davlat marosimlarini oʻtkazish markazi vazifasini ham bajaradi.
Panteonga kimlar kiritilishi mumkin?
Qonunga koʻra, panteonda Ukrainaning turli tarixiy davrlardagi davlat rahbarlari, mamlakat prezidentlari, ukrain harbiy tuzilmalari bosh qoʻmondonlari, shuningdek, fan, madaniyat, taʼlim, din va davlat qurilishi sohasidagi taniqli shaxslar xotirasi abadiylashtirilishi mumkin.
Impichment tartibida lavozimidan chetlatilgan prezidentlar bundan mustasno boʻladi.
Ukraina bilan bogʻliq Nobel mukofoti sovrindorlarining xotirasini ham panteonda abadiylashtirish imkoniyati nazarda tutilgan.
Novini.LIVE nashrining yozishicha, panteonda kimlarni dafn etish yoki qayta dafn etish boʻyicha yakuniy qaror maxsus tashkil etiladigan davlat komissiyasi tomonidan qabul qilinadi. Komissiya ishiga olimlar ham jalb etilishi koʻzda tutilgan.
Polsha bilan yangi kelishmovchiliklar yuzaga kelishi mumkin
Loyihaning bahsli jihatlaridan biri Ukraina isyonchilar armiyasi - UIA aʼzolari xotirasini panteonda abadiylashtirish imkoniyati bilan bogʻliq.
