Ukraina prezidenti Volodimir Zelenskiy mamlakat oldida turgan ikkita global muammo sifatida Rossiyaning ballistik raketalar bilan zarbalari va mudofaani moliyaviy taʼminlash masalasini koʻrsatdi.
Zelenskiy bu haqda 23-avgust kuni Daniya, Latviya, Litva, Norvegiya, Finlandiya va Estoniya rahbarlari Kiyevga tashrif buyurgan bir paytda maʼlum qildi.
Ukraina rahbariga koʻra, mamlakat Yevropa Ittifoqidan 30 mlrd yevro mablagʻ kelib tushishini kutmoqda. Ushbu mablagʻ YEI tomonidan ikki yilga moʻljallangan 90 mlrd yevrolik kredit dasturi doirasida ajratilishi koʻzda tutilgan.
Zelenskiy mablagʻlarning ajratilishi tegishli qonun hujjatlari qabul qilinishi bilan bogʻliq ekanini taʼkidladi. Shu sababli u Ukraina parlamenti, jumladan muxolifat vakillarini ham zarur qarorlarni qabul qilishda faol ishtirok etishga chaqirdi.
«Bu 30 milliard hukumatda ham, muxolifatda ham yoʻq. Ammo bu mablagʻ butun mamlakat mudofaasi uchun zarur», - dedi Ukraina prezidenti.
Mudofaa byudjetiga 27 mlrd dollar yetishmayapti
Zelenskiyning maʼlum qilishicha, Ukraina Mudofaa vazirligi byudjeti taqchilligi hozirda 27 mlrd dollarni tashkil etmoqda. Bu 23,1 mlrd yevrodan ziyod mablagʻga teng.
Uning aytishicha, taqchillikka, jumladan, yilning birinchi yarmida rejalashtirilganidan koʻproq mablagʻ sarflangani ham sabab boʻlgan.
Prezident hisob-kitoblariga koʻra, Ukraina armiyasini 2027-yil yanvar oyiga tayyorlash uchun 8–10 mlrd dollar zarur. Yana qariyb 20 mlrd dollar harbiy xizmatchilarga maosh toʻlash, halok boʻlgan harbiylarning oilalariga toʻlovlarni amalga oshirish va boshqa mudofaa xarajatlarini qoplash uchun kerak boʻladi.
Zelenskiy ushbu masala boʻyicha Fransiya va Germaniya bilan muzokaralar olib borayotganini bildirdi. Uning taʼkidlashicha, Ukraina uchun avvaldan koʻzda tutilgan Yevropa mablagʻlarining ikkinchi qismini ajratishni tezlashtirish talab etilmoqda.
Kiyevga olti davlat rahbari keldi
Zelenskiyning bayonoti «Shimoliy-Boltiq sakkizligi» (NB8) formatiga kiruvchi olti davlat - Daniya, Latviya, Litva, Norvegiya, Finlandiya va Estoniya rahbarlarining Kiyevga tashrifi bilan bir kunga toʻgʻri keldi.
Tashrif Ukraina Mustaqillik kuni - 24-avgust arafasida amalga oshirilmoqda.
Ukraina tashqi ishlar vaziri Andrey Sibixaga koʻra, Yevropa davlatlari rahbarlari Zelenskiy bilan ikki tomonlama va koʻp tomonlama muzokaralar oʻtkazadi. U uchrashuvlar yakunlari boʻyicha «muhim qarorlar qabul qilinishi va muhim bayonotlar berilishi»ni maʼlum qildi.
Shu bilan birga, Norvegiya bosh vaziri Yonas Gar Styore hukumati mamlakat parlamentiga 2027-yilda Ukraina uchun 85 mlrd norveg kronasi - qariyb 8 mlrd yevro ajratish taklifini kiritishini bildirdi. Oslo 2026-yilda ham Kiyevga xuddi shuncha miqdorda mablagʻ ajratgan.
