Suriya rasmiylari Suvaydadan badaviy oilalarni evakuatsiya qilishni boshladi

Suriya hukumati Suvayda shahri vakillari bilan kelishilgan holda, 1500 ga yaqin badaviylar ketishi uchun u yerga pikap va mikroavtobuslar yetkazmoqda. Bu haqda Suriyaning SANA davlat agentligi xabar berdi.

Unda pikap va mikroavtobuslarda odamlar evakuatsiya qilinayotgani tasvirlari chop etilgan. Germaniyaning dpa agentligi ma’lumotlariga ko‘ra, jami 1500 ga yaqin odam evakuatsiya qilinishi rejalashtirilgan. Ulardan 350 nafari qo‘shni Dara viloyatiga yetkazilgan.

Suriya o‘tish davri hukumati Ichki ishlar vazirligi rahbari Ahmad al-Dalatiy halokatli to‘qnashuvlar fonida Suvaydani tark etishga majbur bo‘lgan tinch aholining shaharga qaytishiga ruxsat berishni rejalashtirayotganini aytdi. «Biz yangi janglarning oldini olish va hududda murosa va barqarorlikka yo‘l ochishga harakat qilmoqdamiz», — dedi al-Dalatiy.

19 iyul kuni Suriya muvaqqat prezidenti Ahmad al-Sha’ra idorasi asosan darziylar istiqomat qiluvchi Suvayda viloyatida «zudlik bilan o‘t ochishni to‘xtatish» haqida e’lon qildi. Biroq, kuzatuvchilarga ko‘ra, ba’zi janglar davom etgan. 20 iyul kuni darziylar Suvayda shahrini to‘liq nazorat ostiga oldi.