Kiyevda hakerlar forumi ma’muri qo‘lga olindi

Yevropol Fransiya politsiyasi ko‘magida Ukrainada rus tilidagi XSS.is hakerlik forumining ma’murini qo‘lga oldi. 2013 yildan beri faol bo‘lgan XSS.is anonim forumi 50 mingdan ortiq foydalanuvchiga ega va global kiberjinoyatchilik uchun eng muhim onlayn-resurslardan biri hisoblangan, deya ta’kidladi huquq-tartibot idoralari xodimlari.

XSS.is hakerlar tomonidan, xususan, hakerlik vositalari, o‘g‘irlangan ma’lumotlar va noqonuniy xizmatlarni sotish uchun foydalanilgan, deyiladi bayonotda.

Fransiya tomonidan 2021 yilda boshlangan uzoq muddatli tergov Ukraina va Yevropol bilan yaqin hamkorlikda olib borildi, deyiladi Yevropa Ittifoqi politsiya xizmati bayonotida. Kiyevda XSS.is sayti ma’muri ekani aytilayotgan shaxs qo‘lga olingan.

Qo‘lga olingan shaxs, Yevropol ma’lumotlariga ko‘ra, jinoiy faoliyatni tashkil qilishda asosiy rol o‘ynagan. U vositachi sifatida jinoyatchilar o‘rtasidagi kelishmovchiliklarni hal qilgan va bitimlar xavfsizligini kafolatlagan. Taxminlarga ko‘ra, u kiberjinoyatchilar uchun onlayn muloqotni ta’minlovchi thesecure.biz xizmatini ham boshqargan.