Kamchatkadagi sunami atom suvosti kemalari bazasidagi pirsga zarar yetkazdi

30 iyul kuni Kamchatkada sodir bo‘lgan kuchli zilzila oqibatida yuzaga kelgan sunami Vilyuchinsk shahri yaqinidagi harbiy bazaning pirsiga zarar yetkazdi. Buni 4 avgust, dushanba kuni Amerikaning The New York Times gazetasi tomonidan e’lon qilingan sun’iy yo‘ldoshdan olingan suratlar tasdiqlaydi.

Nashr Amerikaning Planet Labs kompaniyasi yuqori aniqlikdagi rangli sun’iy yo‘ldosh suratlarini chop etdi. Ular pirslardan biri qisman ikkiga bo‘linib ketganini ko‘rsatadi. Boshqa zarar yo‘q. Bir nechta kemalar, jumladan, beshta suvosti kemasi yaqin atrofdagi boshqa pirslarda bo‘lgan. NYT ta’kidlashicha, radiatsiya darajasida ham o‘sish kuzatilmagan.

"Rybachiy" bazasi sifatida ham tanilgan "Vilyuchinsk" joylashish punktida Rossiya Tinch okean flotining aksariyat atom suvosti kemalari joylashgan.

1 avgust kuni Britaniyaning The Daily Telegraph gazetasi ham Vilyuchinskdagi baza sunami oqibatida zarar ko‘rgani haqida xabar berdi. Nashr Amerikaning Umbra Space firmasining past aniqlikdagi oq-qora tasvirlariga ishora qilgan. Ular, shuningdek, pirslardan biri qisman bo‘linib ketganini ko‘rsatdi.

Tasvirlarga ko‘ra, shikastlangan pirs yaqinida bironta ham suvosti kemasi bo‘lmagan. Shu sababli, The Daily Telegraph gazetasi yetkazilgan zararning harbiy ahamiyatga ega bo‘lishini dargumon deb yozgan.