Xorazmda 119 nafar xodimga 1,3 mlrd so‘mlik ish haqi undirib berildi

Respublika bo‘yicha joriy yilning birinchi yarmida 10 501 nafar xodimning 129 mlrd 769 mln so‘m oylik ish haqi va unga tenglashtirilgan to‘lovlari undirib berilgan.

Foto: Kun.uz

Xorazm viloyati Kambag‘allikni qisqartirish va bandlik boshqarmasi Davlat mehnat inspeksiyasi tomonidan WBM Qo‘shko‘pir Claster MChJ korxonasi faoliyatida mehnat huquqlari buzilishi yuzasidan xizmat tekshiruvi o‘tkazildi.

Natijada korxona tomonidan joriy yilning shu davriga qadar 119 nafar xodimga ish haqlari to‘lanmagani aniqlanib, mazkur xodimlarga 1 milliard 310 million so‘m miqdorida ish haqi va unga tenglashtirilgan to‘lovlar undirib berildi.

Respublika bo‘yicha joriy yilning birinchi yarmida Davlat mehnat inspeksiyasi tomonidan o‘tkazilgan nazorat tadbirlari davomida 10 501 nafar xodimning 129 mlrd 769 mln so‘m oylik ish haqi va unga tenglashtirilgan to‘lovlari undirib berilgan.