Xalqaro sertifikati yo‘q o‘qituvchilarni ishdan bo‘shatish bo‘yicha ko‘rsatma berilmagan - vazirlik

Maktabgacha va maktab ta’limi vazirligi xalqaro til sertifikati yo‘q o‘qituvchilar bilan tuzilgan mehnat shartnomalarini bekor qilish yuzasidan rasmiy ko‘rsatma bermagan.

Vazirlikning O‘zbekiston ta’lim va fan xodimlari kasaba uyushmalari respublika kengashiga yo‘llagan javob xatida ta’kidlanishicha, “Vazirlik tomonidan hududiy boshqarmalar va tizim tashkilotlariga joriy o‘quv yilidan boshlab xorijiy tillarni o‘zlashtirish darajasi bo‘yicha kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lmagan xorijiy tillar o‘qituvchilari bilan tuzilgan mehnat shartnomalarini bekor qilish yuzasidan rasmiy ko‘rsatma berilmagan”.

Shuningdek, javob xatida xorijiy til o‘qituvchilari uchun avgust oyida chet tilini bilish darajasini aniqlash uchun qo‘shimcha test sinovlarini tashkil etish chorasi ko‘rilayotgani ma’lum qilingan.

Iyul oyi oxirlarida O‘zbekiston ta’lim va fan xodimlari kasaba uyushmalari respublika kengashi xalqaro til sertifikati yo‘q o‘qituvchilarni ishdan bo‘shatmaslik bo‘yicha Maktabgacha va maktab ta’limi vazirligiga taqdimnoma kiritgandi.