Yevrosiyo banki O‘zbekistondagi shu’basini yopayotganiga izoh berdi

Qozog‘istonning “Yevrosiyo banki” AJ O‘zbekistondagi faoliyatini tugayotganini ma’lum qildi. Avvalroq O‘zbekiston regulyatori qozoq bankining ayni nomdagi shu’basiga 2024 yilda berilgan litsenziya bekor qilinganini bildirgandi.

Qozog‘iston banki O‘zbekistondagi faoliyatini yakunlanayotganini “biznesni Qozog‘istonda rivojlantirish uchun resurslarni konsentratsiya qilish bo‘yicha avvalroq qabul qilingan strategik qarorning mantiqiy yakuni” deya izohladi.

“Boshqaruv va direktorlar kengashi O‘zbekistondagi bankka investitsiyalarni to‘xtatishni regulyator tomonidan rasmiy ogohlantirish berilishidan ancha oldinroq ma’qullangan edi.

Asosiy e’tiborni Qozog‘iston bozoriga qaratish bankka yangi loyihalarni amalga oshirish hamda mijozlar va hamkorlar uchun eng salohiyatli segmentlardagi pozitsiyalarni mustahkamlash imkonini beradi”, – deyiladi 28 avgust kuni e’lon qilingan press-relizda.

27 avgust kuni O‘zbekiston Markaziy banki boshqaruvi “Yevrosiyo banki” AJning litsenziyasini bekor qilish, bankni majburiy tugatish va tugatish komissiyasini tayinlash to‘g‘risida qaror qabul qildi.

Regulyatorning ma’lum qilishicha, bank tomonidan ustav kapitali miqdori qonunchilikda belgilangan eng kam talablarga muvofiqlashtirilmagan hamda banklar va bank faoliyati to‘g‘risidagi qonunchilikda belgilangan boshqa talablar bajarilmagan.

Yevrosiyo banki – Qozog‘istondagi shu nomli bankning O‘zbekistondagi shu’basi bo‘lib, 2024 yil yanvar oyida litsenziya olgandi. 2025 yil 1 avgust holatiga, bankning depozit va kredit portfeli nolga teng, kapitali esa 104 mlrd so‘mni tashkil etadi, bu – talab etiladigan minimal miqdordan 5 barobarga kam.

Kredit tashkiloti 2025 yilning birinchi yarmini 51,6 mlrd so‘m zarar bilan yakunlagan.

Qozog‘istondagi Yevrosiyo bankiga 1994 yilda asos solingan, bosh ofisi Olmaota shahrida joylashgan. Forbes ma’lumotiga ko‘ra, kompaniyaning yakuniy benefitsiarlari Ibragimovlar oilasi, Aleksandr Mashkevichning vorislari va Fattoh Shodiyev hisoblanadi.