Germaniya O‘zbekistondan ishchilarni hunarmandchilik korxonalariga jalb qiladi

Maqolada yozilishicha, Germaniya Iqtisodiyot va iqlimni muhofaza qilish federal vazirligining Fit for Climate loyihasi O‘zbekiston va Kolumbiyadan malakali ishchilarni mamlakatdagi hunarmandchilik korxonalariga, xususan, iqlim bilan bog‘liq sohalardagi kasblarga jalb qilishga qaratilgan.

Ta’kidlanishicha, O‘zbekistondan mutaxassislarni jalb qilish Pool usuli, ya’ni nomzodlar bazasidan tanlash asosida amalga oshiriladi. "Dastlab O‘zbekistonda kasbiy tayyorgarlikka ega va nemis tilini boshlang‘ich darajada biladigan nomzodlar saralab olinadi. Tanlab olingan malakali mutaxassislar Germaniyadagi Gyote-Institutda 9 oylik nemis tili kursini (B1 darajagacha) va madaniy moslashuv bo‘yicha tayyorgarlik dasturini o‘taydi. Keyingi bosqichda talabgor korxonalar tayyor nomzodlarning rezyumelari bilan tanishadi va ularni bevosita suhbat asosida tanlab oladi hamda ish bilan ta’minlaydi", – deyilgan maqolada.

Shuningdek, materialda loyiha hunarmandchilik korxonalariga viza rasmiylashtirish, mutaxassislik diplom va malaka hujjatlarini tan olinishi hamda yangi xodimlarni ishga moslashtirish jarayonlarida yordam ko‘rsatilishi ta’kidlangan.

Fit for Climate – Germaniyada hunarmandchilik sohasida xorijlik malakali kadrlarni maqsadli jalb qilish va ularni integratsiya qilishga qaratilgan pilot loyiha bo‘lib, u 2027 yilning dekabr oyigacha davom etadi", – deyiladi Deutsche Handwerk Zeitung maqolasi xulosasida.