Armani modani qulay va nafis uslubda taklif qilgani bilan ajralib turdi: u kiyinishda ortiqcha jo‘shqinlik va behuda bezaklardan chetlashib, “kamtarlikdagi nafislik” tamoyilini barpo etdi. Jorjo moda sanoatida o‘ziga xos dunyoqarash yaratib, milliardlab dollarlik moda imperiyasini bunyod etgani ortidan tarixda qoldi.
U 1934 yil 11 iyulda Italiyaning Pyachensa shahrida tug‘ilgan. Armani yoshligida shifokor bo‘lishni orzu qilgandi va bir muddat Milan universitetining tibbiyot fakultetida ham ta’lim olgan. Biroq 1950 yillarning o‘rtalarida u Milan markazidagi mashhur “La Rinassente” do‘konida deraza bezakchisi (window dresser) bo‘lib ishladi. Bu oddiy ish orqali Armani kiyim-kechak dunyosini yaqindan o‘rgana boshladi va moda dizayni yo‘liga qadam qo‘ydi. Tez orada u Nino Cherruti ustozligida dizayn sir-asrorini o‘rgana boshladi.
1970 yillar boshidan Armani karerasi tez sur’atlar bilan o‘sib bordi. 1975 yilda u do‘sti Serjo Galeotti bilan birgalikda o‘z nomidagi tayyor kiyimlar brendini — Armani kompaniyasini — ishga tushirdi. Dastlab u erkaklar uchun liboslar chizgan bo‘lsa-da, 1976 yilda ayollar kiyimlari ham kompaniya kolleksiyasiga qo‘shildi. Bir necha yil ichida uning dizaynlari Parij va Nyu-York kabi moda markazlarida namoyish etila boshladi. Bu brend tez orada xalqaro maydonda tan olinib, Armani o‘z uslubi bilan moda olamiga yangi yo‘nalish olib kirgan dizayner sifatida e’tirof etildi.
Armanining modadagi uslubi bo‘yicha inqilobiy yangiliklardan biri uning yengsiz sport kurtkalari bo‘ldi. 1970 yillar oxirida u maxsus ichki tikilmagan, juda nozik sport kurtkalarini yaratdi va bu yuqori martabali odamlar orasida katta e’tibor qozondi. Shuningdek, u oddiy futbolka bilan birgalikda kiyiniladigan sodda va qulay modelni ilgari surdi. Erkaklar uchun an’anaviy kostyumlarga esa yangi nafas kiritildi: juda yumshoq va yengilligi bilan ajralib turadigan kostyumlar yaratildi.
Ayollar uchun esa Armani “ishbilarmonlik kostyumi” — keng yelkali bluzka va erkaklarnikiga o‘xshash keng shim, yubkalarni ilgari surdi. Bu o‘ziga xos uslub 1980 yillar korporativ madaniyati ramziga aylandi.
Moda olamidagi o‘ziga xos mavqe topgan Armani kinofilm sanoatiga ham katta hissa qo‘shgan. 1980 yilda chiqqan “American Gigolo” filmidagi Richar Gere kostyumlari Armani nomini butun dunyoga tanitdi. Bu film orqali Armani kiyimlari Hollywood yulduzlari, jumladan Richar Gere va Jodi Foster kabi aktyorlar orasida mashhurlikka erishdi. 2000 yilda Nyu-Yorkdagi Guggenheim muzeyi Armanining moda ta’sirini qadrlab, uning yaratilgan dizaynlari retrospektiv ko‘rgazmasini taqdim etdi. Armani o‘z uslubi haqidagi fikrlaridan birida: “Men vaqt o‘tib eskirmaydigan narsalarni sevaman, eng yaxshi namunalariga mehrim bor”, deb ta’kidlagan edi.
