Mahsulotlarni tekinga tarqatishi haqida e’lon bergan Yunusoboddagi do‘kon egalariga nisbatan tekshiruv o‘tkazilmoqda

Xabar qilinishicha, 14 sentabr kuni Yunusobod tumani Markaz-5 dahasida joylashgan do‘konlardan birida ozuqaviy qo‘shimchalar (sport bilan shug‘ullanuvchilarga mo‘ljallangan vitaminlar, minerallar va boshqa mahsulotlar) tekinga tarqatilishi haqida mazkur do‘konning ijtimoiy tarmoqdagi sahifasida e’lon berilgan. 

Ushbu e’lon asosida ko‘plab fuqarolar do‘kon oldida to‘plangan. Biroq do‘kon egalari tomonidan bu kabi ommaviy tadbirni o‘tkazish haqida tegishli tashkilotlardan ruxsat olinmagan.

Hodisa joyiga yetib kelgan ichki ishlar organlari xodimlari tomonidan vaziyat nazoratga olingan va fuqarolar tarqatilgan, hech kim tan jarohati olmagan.

“Mazkur holat yuzasidan do‘kon egalarining harakatlariga huquqiy baho berish maqsadida Yunusobod tumani IIO FMB tomonidan tergovga qadar tekshiruv o‘tkazilmoqda. Yakuni bo‘yicha qonuniy qaror qabul qilinishi ta’milanadi”, deyiladi Toshkent shahar IIBB matbuot xizmati xabarida.