Belarusni tark etishdan bosh tortgan Statkevich koloniyaga qaytarildi

Tasdiqlanmagan ma’lumotlarga ko‘ra, 11 sentabr kuni boshqa siyosiy mahbuslar bilan birga ozodlikka chiqqan va Litvaga ketishdan bosh tortgan Belarus prezidentligiga sobiq nomzod 69 yoshli Nikolay Statkevich koloniyaga qaytarilgan. Uning qayerdaligi bir necha kun mavhum bo‘lganidan so‘ng, u Glubokoye shahridagi koloniyalardan birida topildi, deb xabar berdi «Nasha Niva» nashri «ishonchli manba»ga tayanib.

Statkevich haqida boshqa hech qanday ma’lumot berilmagan, boshqa ommaviy axborot vositalari ham Belarus rahbari Aleksandr Lukashenkoning raqibi taqdiri haqida hech narsa xabar qilmagan. «Zerkalo» va «Nasha Niva» nashrlarining ta’kidlashicha, Statkevich ozod etilishidan oldin Vitebsk viloyatining Glubokoye shahridagi koloniyada inkommunikado rejimida saqlangan.

Ayni paytda siyosatchining rafiqasi Marina Adamovichning aytishicha, Glubokoyedagi 13-sonli axloq tuzatish koloniyasi muxolifat yetakchisining qayerda ekanligi haqida qandaydir ma’lumot berishdan bosh tortmoqda.