Telekommunikatsiya operatorlariga tashqi internet kanallariga ulanishga ruxsat berildi

O‘zbekistonda faoliyat yuritayotgan telekommunikatsiya operatorlariga tajriba tariqasida 2030 yilgacha xalqaro internet kanallarga ulanishga ruxsat berildi. Bu Vazirlar Mahkamasining 18 sentabrdagi «Telekommunikatsiya bozorini bosqichma-bosqich liberallashtirish va raqobat muhitini shakllantirishga doir qo‘shimcha chora-tadbirlar to‘g‘risida»gi qarorida (.pdf) nazarda tutilgan.

Hujjatga ko‘ra, mamlakatda mobil yoki simli tarmoqlarga ega bo‘lgan, biroq xalqaro internet tarmoqlariga to‘g‘ridan-to‘g‘ri ulanish huquqiga ega bo‘lmagan telekommunikatsiya operatorlariga 2030 yil 1 yanvarga qadar tajriba tariqasida shunday huquq beriladi.

Ulanishni muvofiqlashtirish uchun mas’ul organ — Raqamli texnologiyalar vazirligi, ishchi organ — «Respublika telekommunikatsiya tarmoqlarini boshqarish markazi» DUK etib belgilandi.

Hujjat Jahon savdo tashkiloti (JST) talablarini hisobga olgan holda, shuningdek, axborot va milliy xavfsizlikni ta’minlashda telekommunikatsiya kompaniyalarining investitsiyaviy faolligini rag‘batlantirish va xalqaro internet tarmoqlariga ulanish tartibini takomillashtirishga qaratilgan.

Hukumat, shuningdek, xalqaro internet tarmoqlariga ulanish huquqini olishni istagan telekommunikatsiya operatorlari uchun vaqtinchalik talablar va shartlarni tasdiqladi. Jumladan, ulanishni Xalqaro internet tarmoqlariga ulanish markazlari (XITUM) orqali amalga oshirish, mamlakat hududining kamida 50 foizini qamrab olgan magistral optik tolali tarmoqlarga, shuningdek, o‘z telekommunikatsiya infratuzilmasiga ega bo‘lish.

Bugungi kunda deyarli barcha provayderlar «O‘zbektelekom» kompaniyasining Xalqaro paketli kommutatsiya markazi orqali internetga ulanish imkoniyatiga ega. Shuningdek, internetga ulanish xizmati (ulgurji darajada) ham «O‘zbektelekom» ixtiyorida qolmoqda.