“Lixiang L9 uchun 67 ming dollar to‘lagandim” - “Premier Motors” fuqarolarni chuv tushirdi

Toshkent shahridagi “Premier Motors Auto” MChJ vakillariga nisbatan jinoyat ishi qo‘zg‘atildi. Tergov hujjatlariga ko‘ra, ular mashina olib berish va’dasi bilan fuqarolarni aldab kelishgan. Jabrlanuvchilar tergov jarayonlaridan norozi ekanliklarini, rasmiy idoralarga qilingan murojaatlaridan naf chiqmayotganini aytmoqda.

{Yii::t(}

O'tkazib yuborish 6s

O'tkazib yuborish

Bir guruh fuqarolar Kun.uz’ga murojaat qilib, Toshkent shahridagi “Premier Motors Auto” MChJ faoliyatidan norozi ekanliklarini bildirdi. Ularning ta’kidlashicha, avtosalon vakillari mashina olib berish va’dasi bilan aldashgan. Biroq oylar o‘tganiga qaramay na mashina olib berishgan, na to‘lov pulini qaytarishgan.

Jabrlanuvchilardan biri Equinox olish maqsadida avtosalonga 235 mln so‘m to‘laganini, biroq 9 oydan beri turli va’dalar bilan aldab kelishayotganini ta’kidladi.

“Mashina qachon keladi, deya so‘rasak, har safar ertaga, indinga, obeddan keyin chiqadi, deb aldayverdi. Avtosalondagi xodimlar ham mashinangiz kelyapti, deb bizni aldashdi. 9 oydan beri ishimiz hal bo‘lmayapti”, deydi fuqaro Ravshan Hasanov.

Kun.uz tanishgan ayblov xulosasida keltirilishicha, Ravshan Hasanov Yakkasaroy tumani, Qushbegi dahasida joylashgan “Premier Motors” avtosaloniga mashina xarid qilish maqsadida borgan. “Premier Motors Auto” MChJ menejeri D.I. Ravshan Hasanov bilan uchrashgan hamda unga o‘zini ushbu avtosalon rahbari sifatida tanishtirgan. So‘ngra 235 mln so‘m evaziga Equinox mashinasini qisqa muddatda olib kelib berishini va’da qilgan. Unga ishongan Ravshan Hasanov ushbu miqdordagi pulni to‘lagan. U va “Premier Motors Avto” MChJ direktori Sh.R. o‘rtasida 2024 yil 13 dekabr kuni “Konsalting xizmatlar ko‘rsatish yuzasidan” 8-sonli shartnoma tuzilgan. Biroq o‘tkazilgan sudga oid xatshunoslik ekspertizasi shartnomadagi MChJ rahbarining imzosi qalbakilashtirilgani, uni D.I. qo‘ygani haqida xulosa bergan.

Jabrlanganlarning aytishicha, aldanib qolganlarning aksariyati Instagram ijtimoiy tarmog‘ida ko‘rsatilgan reklamaga ishonib to‘lov qilgan. Ular orasida 67 ming, 35 ming, 10 200 dollar, 235 mln so‘m to‘lov qilgan fuqarolar bor.

“Premier Motors”da ishlaydigan D.I.ni anchadan beri tanirdim. Unga Cobalt mashinasi kerakligini aytdim. U menga ikki kundan keyin aloqaga chiqib, Cobalt borligini hamda bir hafta muddatda mashinani chiqarib berishini aytgandi. Shunga ishonib men ham Cobalt mashinasiga 10 200 dollar pul berdim. Avtosalonga borib to‘lov qilmaganman, D.I.ning qo‘liga berganman. U uyimga kelib pulni olib ketgan. Shu bilan ana chiqyapti, mana chiqyapti deb vaqt cho‘zildi. Haligacha mashinani olganim yo‘q”, deydi fuqaro Valixon A’zamov.

Yana bir jabrlanuvchi Saidikrom Saidumarov esa Lixiang L9 mashinasini xarid qilish niyatida avtosalonga borib, aldangan.

“2024 yil dekabr oyida Qushbegidagi “Premier Motors” avtosaloniga mashina olish maqsadida borganmiz. O‘sha yerda bir qiz kutib olgan. Lixiang L9 mashinasiga 67 ming dollar to‘lov qilganman. O‘sha paytda bu mashina 70 ming dollar edi. “Premier Motors”dagi qiz bilan gaplashganimda u mashina narxi 67 ming dollar ekanini aytib, aldab bizni chaqirib olgan. Boshqa joydan 2-3 ming dollar arzon ekan, deb qiziqib borganmiz-da. Keyin bilsak D.I. mashennik bola ekan” deydi u.

Avvalroq “Premier Motors Auto” MChJ ta’sischilaridan biri, menejeri va ishchilari firibgarlikda gumonlanayotgani, xususan, avtosalon menejeri 20 ga yaqin holatda mashina olib berish yoki sotib olish va’dasi bilan fuqarolarni aldagani hamda to‘langan milliardlab so‘m pullarni o‘z ehtiyojiga ishlatib yuborgani xabar qilingandi. Umumiy hisobda o‘zlashtirilgan mablag‘ 7 mlrd so‘mdan ortiq.

Jinoyat ishining “Premier Motors Auto” MChJ ta’sischilaridan biri Sh.R. va jamiyatning bir nechta ishchilariga oid qismi ajratilib, alohida ish yurituviga olingan.