Qirg‘izistonda muddatidan oldingi parlament saylovi sanasi belgilandi

Qirg‘iziston prezidenti Sadir Japarov Jogorku Kenesh (parlament) deputatlarining muddatidan oldingi saylovini tayinlash to‘g‘risidagi farmonni imzoladi.

Hujjatga ko‘ra, saylov 2025 yil 30 noyabr, yakshanba kuni bo‘lib o‘tadi. Saylov va referendum o‘tkazuvchi Markaziy komissiyaga ularni o‘tkazishni qonunchilikka muvofiq tashkil etish hamda masofadan turib ovoz berishni qo‘llash vazifasi yuklatildi.

Vazirlar Mahkamasiga zarur moliyaviy mablag‘lar ajratish, qonuniylikni, fuqarolarning huquq va erkinliklarini ta’minlash, jamoat tartibini saqlash choralarini ko‘rish, shuningdek, saylovchilarning ro‘yxatini shakllantirish uchun Aholining yagona davlat reyestri ma’lumotlarini aniqlashtirish topshirildi. Bundan tashqari, hukumat saylovchilarni onlayn identifikatsiya qilish tizimini takomillashtirish va saylov jarayonida qo‘llaniladigan elektron tizimlarning kiberxavfsizligini ta’minlashi kerak.

Bosh prokuratura saylovga tayyorgarlik ko‘rish va uni o‘tkazishda Konstitutsiya va qonunlarga rioya etilishini nazorat qilishi lozim. Mahalliy davlat hokimiyati va o‘zini o‘zi boshqarish organlariga tashkiliy-texnik masalalarni hal etishda saylov komissiyalariga ko‘maklashish topshirildi.

Qirg‘iziston parlamenti 25 sentabr kuni o‘zini o‘zi tarqatib yubordi. Bunga parlament va prezidentlik saylovlari orasidagi vaqt juda qisqaligi sabab qilib ko‘rsatildi. Qarorni 89 deputatdan 84 nafari yoqladi, hech kim qarshi ovoz bermadi.