Telefonda qanday bakteriyalar yashaydi?

Smartfon hayotimizning ajralmas qismiga aylangan - u qo‘limizda, sumkamizda, cho‘ntagimizda, ishxonada va hatto yotoqxonada ham bizni tark etmaydi. Ammo ko‘pchiligimiz bir narsani unutamiz: telefon faqat aloqa vositasi emas, ko‘zga ko‘rinmas mikroblar uchun shinamgina “uy” hamdir.

Foto: AP

Tadqiqotlar shuni ko‘rsatadiki, smartfon yuzasida hojatxona o‘rindig‘idan ham ko‘proq bakteriya to‘planishi mumkin.

Telefonimiz bilan kun davomida juda ko‘p narsaga tegamiz: eshik tutqichi, jamoat transporti, pul, stol va boshqa buyumlar. Shundan keyin qo‘lni yuvmasdan gadjetga qo‘l tekkizish orqali bakteriyalarni osongina ko‘chirib olamiz.

Mutaxassislar aniqlashicha, smartfonlarda stafilokokk, ichak tayoqchasi (E.coli), salmonella kabi turli mikroorganizmlar uchraydi. Ular inson salomatligi uchun jiddiy xavf tug‘diradi: diareya, nafas yo‘llari infeksiyalari, teri muammolari, hatto allergik reaksiyalarni keltirib chiqarishi mumkin.

Yana bir xavfli jihati shundaki, telefondagi bakteriyalar tezda ko‘payadi. Masalan, iliq muhit va doimiy qo‘l tegishi mikroblar uchun qulay sharoit yaratadi. Natijada ular yuzada uzoq vaqt saqlanib qoladi. Ayniqsa, ko‘chada ovqat yeyishdan oldin yoki yotoqda yotib telefondan foydalanish orqali mikroblar og‘iz va burun orqali organizmga oson kirib boradi.

Shu bois, mutaxassislar smartfonni muntazam dezinfeksiya qilishni maslahat beradi. Telefon yuzasini maxsus antibakterial salfetka yoki spirtli eritma bilan arting, ovqatlanish vaqtida telefondan foydalanmang, yotishdan oldin esa uni yotoqxonaga olib kirmaslikka odatlaning. Eng muhimi – qo‘lni tez-tez yuvib turishni unutmang!

Tayyorlagan: Диёрахон Набижонова

#Smartfon #bakteriyalar