OAV Tunberg Isroilda og‘ir sharoitlarda ushlab turilganini xabar qildi

Shvetsiyalik ekofaol Greta Tunberg Isroil rahbariyati uni qandalalar bor kameraga qamab qo‘ygani, yetarlicha oziq-ovqat va suv bermayotgani haqida shikoyat qilgan. Bu haqda Tunbergning Shvetsiya rasmiylari bilan yozishmalaridan xabardor bo‘lgan The Guardian nashri xabar bermoqda.

Shvetsiya elchixonasi diplomati Tunberg saqlanayotgan kameraga borgan. Uning Shvetsiya Tashqi ishlar vazirligiga yuborgan elektron xatida aytilishicha, Tunberg «shafqatsiz munosabat haqida gapirib bergan va qattiq joyda uzoq vaqt o‘tirishiga to‘g‘ri kelgani»ni aytgan. «U [Tunberg] degidratatsiya (suvsizlanish) haqida xabar berdi. Unga yetarlicha suv va oziq-ovqat berishmagan. Shuningdek, u o‘zida toshma paydo bo‘lganini, uni qandalalar keltirib chiqargan deb gumon qilganini aytdi», – deb yozadi diplomat.

Bundan tashqari, yozishmaga ko‘ra, qo‘lga olinganlardan boshqa biri Isroil xavfsizlik kuchlari Tunbergni Isroil bayrog‘ini ko‘targan holda suratga tushishga majbur qilishganini aytgan.

​Malayziyalik faol Hazvani Helmi va amerikalik Vindfild Biver esa Tunberg «Isroil bayrog‘ini o‘pishga majburlangani»ni aytishgan.

«Bu fojia edi. Ular bizga hayvonlardek munosabatda bo‘lishdi», degan Helmi ularga toza suv, oziq-ovqat va dori-darmon berilmaganini ta’kidlab.

​Italiyalik jurnalist Lorenzo Agostino ham Tunbergga nisbatan munosabatni tanqid qildi.

«Greta Tunberg – jasur qiz. U atigi 22 yoshda. Uni xo‘rlab, Isroil bayrog‘iga o‘rab, g‘alaba ramzidek ko‘rsatishdi», deydi u.

Tunberg Global Sumud Flotilla (GSF) flotiliyasi bilan G‘azoga yo‘l olgan 437 nafar faollar, parlamentariylar hamda huquqshunoslar orasida edi. Isroil TIV flotiliya falastinliklarning Hamas guruhiga aloqadorligini aytgan.

1 oktyabr kuni Isroil flotiliyaning yo‘li to‘sib qo‘yilganini xabar qildi, 3 oktyabr kuni esa faollarning to‘rt nafari mamlakatdan chiqarib yuborilgani, 4 oktyabr kuni yana 137 kishi Istanbulga deportatsiya qilingani haqida xabar berildi.