O‘zbekistonda Turkiya tajribasi bo‘yicha kasbiy malakani baholash markazi tashkil etiladi

Mamlakat elchixonasi ko‘magida kambag‘allikni qisqartirish va bandlik vaziri o‘rinbosari Alisher Murodov boshchiligidagi delegatsiyaning Turkiyaga ishchi safari amalga oshirildi.

Foto: "Dunyo" AA

O‘zbekiston delegatsiyasi a’zolari safar davomida Turkiya mehnat va ijtimoiy himoya vaziri o‘rinbosari Faruk O‘zchelik bilan uchrashdi.

Unda aholini kasb-hunarga o‘qitish, Yevropa andozalariga mos keladigan malaka standartlarini ishlab chiqish, Turkiya tajribasi asosida O‘zbekistonda kasbiy malakalarni baholash markazini tashkil qilish masalalari muhokama qilindi.

Turkiya Kasbiy malakalarni baholash agentligi direktori Ashkin To‘ren bilan kechgan muloqot chog‘ida Yevropa standartlariga muvofiq milliy malaka tizimini ishlab chiqish va amalga oshirishda Turkiya tajribasini o‘rganish, agentlik huzuridagi test va sertifikatlashtirish markazlarining roli, akkreditatsiya va monitoring mexanizmlarini o‘rganish, kasbiy malaka sohasida qo‘shma loyihalar uchun yo‘nalishlarni aniqlash xususida fikr almashildi.

Tomonlar kelgusida mazkur agentlik bilan hamkorlik qilish bo‘yicha qo‘shma «yo‘l xaritasi»ni ishlab chiqishga kelishib oldi.