Reuters: YeIning yetti davlati Rossiyadan energiya resurslari importini oshirdi

YeIga a’zo 27 davlatdan yettitasi 2024 yilga nisbatan Rossiyadan energiya importini qiymat ko‘rsatkichida oshirdi. Bu raqamlar Helsinkidagi mustaqil tashkilot - Energetika va toza havo bo‘yicha tadqiqot markazi (CREA) statistik ma’lumotlariga asoslanib, 10 oktyabr, juma kuni Reuters tahlilida e’lon qilingan.

Joriy yilning sakkiz oyida, ya’ni yanvardan avgustgacha Yevropa Ittifoqi importi 11,4 milliard yevroni tashkil etdi.

Fransiya Rossiyadan energiya resurslari sotib olishni 40 foizga oshirib, 2,2 milliard yevroga yetkazdi, Niderlandiyada esa 72 foizga oshib, 498 million yevroga yetdi. Belgiyada 3 foizga, Xorvatiyada 55 foizga, Ruminiyada 57 foizga, Portugaliyada 167 foizga o‘sgan.

Kreml bilan yaqin aloqada bo‘lgan va Rossiya gazidan butunlay voz kechish g‘oyasini rad etayotgan Vengriya va Slovakiyada bu ko‘rsatkich jami 5 milliard yevroni tashkil qiladi. Vengriyada import 11 foizga oshdi.

Belgiya energetika vazirligi bu o‘sishni Yevropa Ittifoqining o‘ziga xos sanksiyalari bilan izohladi. Ushbu cheklovlar tufayli, kiruvchi suyultirilgan gaz (STG)ni oxirgi manzilga keyingi tashish uchun kemadan kemaga o‘tkazish o‘rniga Belgiyada tushirish kerak.

Fransiya Energetika vazirligining Reuters agentligiga ma’lum qilishicha, bu raqamlar boshqa mamlakatlardagi mijozlarga xizmat ko‘rsatgani uchun oshgan. Kpler tahlilchilariga ko‘ra, Rossiyadan ayrim fransuz importi Germaniyaga jo‘natiladi.

Germaniya gaz uzatish tarmog‘ining 10 foizini boshqaradigan SEFE vakili kompaniya Rossiya gazini Fransiya va Belgiya orqali import qilishini tasdiqladi.

Germaniya Iqtisodiyot vazirligi Reuters agentligiga Yevropa Ittifoqining Rossiya energetika resurslari importini bosqichma-bosqich to‘xtatish borasidagi sa’y-harakatlarini olqishlashini bildirdi. Shu bilan birga, SEFE Rossiyaning "Yamal SPG" kompaniyasidan STG sotib olish bo‘yicha uzoq muddatli shartnoma bilan bog‘langan, uni bekor qilish imkoniyati yo‘q.

«Shartnoma shartlariga ko‘ra... SEFE yetkazib berish amalga oshirilmagan taqdirda ham kelishilgan hajmlarni to‘lashi shart», — deya tushuntirdi idora vakili. «Gazni qabul qilishdan bosh tortish "Yamal"ga ushbu hajmlarni qayta sotish imkonini beradi, bu esa Rossiya iqtisodiyotiga ikki tomonlama yordam bo‘lib qo‘shiladi», — deya qo‘shimcha qildi u.

Niderlandiya hukumati Yevropa Ittifoqining Rossiyadan yetkazib berishni butunlay yo‘q qilish rejalarini qo‘llab-quvvatlashini bildirdi. Vazirlar mahkamasining ta’kidlashicha, bu takliflar Yevropa Ittifoqi qonunchiligida mustahkamlanmaguncha, rasmiylar Yevropa energetika kompaniyalari va Rossiya yetkazib beruvchilari o‘rtasidagi mavjud shartnomalarni bloklay olmaydi.