Birinchi holat Toshkent xalqaro aeroportida aniqlangan. DXX va bojxona organlari xodimlari hamkorligida o‘tkazilgan tezkor tadbir davomida «Bangkok - Toshkent» yo‘nalishida uchib kelgan fuqaroning yuklari belgilangan tartibda rentgen apparati orqali tekshirilgan.
Tekshiruv vaqtida yuklar orasida shubhali oziq-ovqat mahsulotlari borligi aniqlanib, ular ochib ko‘rilgan.
Ma’lum bo‘lishicha, Toshkent viloyati O‘rta Chirchiq tumanida yashovchi, 2002-yilda tug‘ilgan va muqaddam sudlangan shaxs turli oziq-ovqat mahsulotlari niqobi ostida 978 gramm kannabis moyi hamda tarkibida psixofaol modda bo‘lgan, taxminiy og‘irligi 500 gramm qo‘ziqorinlarni olib kirgan.
Tezkor xizmatlar ma’lumotiga ko‘ra, mazkur mahsulotlar keyinchalik sotish maqsadida olib kelingan.
Ikkinchi holat Toshkent tumani hududida qayd etilgan.
Huquqni muhofaza qiluvchi organlar harakatlanayotgan «Damas» rusumli avtomobilni to‘xtatib, xolislar ishtirokida ko‘zdan kechirgan. Avtomobilda yo‘lovchi sifatida ketayotgan Farg‘ona viloyatining Oltiariq va Uchko‘prik tumanlarida yashovchi, 1987 va 1989-yillarda tug‘ilgan ikki nafar shaxsga tegishli polietilen paketlar tekshirilgan.
Natijada ulardan tarkibida «Sibutramin» kuchli ta’sir qiluvchi moddasi bo‘lgan 12 992 dona qahva mahsuloti topilib, protsessual tartibda rasmiylashtirib olingan.
Dastlabki ma’lumotlarga ko‘ra, ushbu mahsulotlar qo‘shni respublikadan olib kelingan bo‘lib, ularni Farg‘ona viloyatida sotish rejalashtirilgan.
Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilgan. Tergov harakatlari davom etmoqda.
