Davlat xavfsizlik xizmati va ichki ishlar organlari xodimlari hamkorligida giyohvandlik vositalarining noqonuniy aylanmasiga qarshi qator tezkor tadbirlar o‘tkazildi.
Xususan, Surxondaryo viloyatining Termiz tumanida qishloq xo‘jaligiga mo‘ljallangan dala maydonida noma’lum shaxslar tomonidan qoldirib ketilgan 4 kg gashish moddasi aniqlandi. Holat protsessual tartibda rasmiylashtirildi.
Shuningdek, DXXning Jizzax viloyati bo‘yicha boshqarmasi va ichki ishlar organlari hamkorligida o‘tkazilgan tezkor tadbirda Zarbdor tumanida yashovchi, 1981 yilda tug‘ilgan shaxs Jizzax shahrida to‘xtatib tekshirildi.
Tekshiruv davomida uning yonidagi xo‘jalik qopidan 4 kg 840 gramm kannabis o‘simligi topilib, ashyoviy dalil sifatida olib qo‘yildi.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda. Shuningdek, mazkur qonunbuzarliklarga aloqador shaxslarni aniqlash bo‘yicha chora-tadbirlar ko‘rilmoqda.
