«Yaqin orada bilib olasiz»: Tramp yadro sinovlari borasida aniq javob bermadi

AQSh prezidenti Donald Tramp 31 oktyabr kuni Vashington yadroviy sinovlarni qayta boshlashini tasdiqladi, ammo bu jumladan yadroviy portlashlarni o‘tkazishni ham nazarda tutadimi-yo‘qmi, degan savolga aniq javob bermadi. «Men bu haqda gapirmayman», — dedi Tramp jurnalistlarga Vashingtondan Palm-Bichga yo‘l olgan Air Force One bortida AQShda yerosti yadroviy sinovlari qayta tiklanadimi-yo‘qmi, degan savolga javob qaytararkan.

«Sizlar buni juda yaqin orada bilib olasizlar, lekin ha, biz muayyan sinovlar o‘tkazamiz. Boshqa davlatlar buni qilyapti. Agar ular shunday qilsa, biz ham qilamiz», — dedi Amerika rahbari.

Tramp 33 yillik tanaffusdan so‘ng yadroviy qurol sinovlarini boshlashni Pentagonga topshirganini bildirgan edi. «Boshqa davlatlar sinov dasturlarini olib borayotgani sababli, Men Mudofaa vazirligiga yadroviy qurolimizni paritet asosida sinashni boshlashni buyurdim. Bu jarayon darhol boshlanadi», — deb yozdi u 30 oktyabr kuni TruthSocial’da. Oq uy rahbari ta’kidlashicha, AQSh «har qanday boshqa davlatga qaraganda ko‘proq yadroviy qurolga ega».

Hozircha Tramp to‘liq quvvatli yadroviy portlashlar, yetkazib berish vositalarini sinash yoki kallaklar portlashsiz tekshiriladigan subkritik sinovlarni nazarda tutgan yoki tutmagani noma’lum.

AQSh 1992 yildan beri to‘laqonli yadroviy qurol sinovlarini o‘tkazmagan. Vashington 1996 yilgi Yadroviy sinovlarni to‘liq taqiqlash to‘g‘risidagi shartnomani imzolagan, biroq ratifikatsiya qilmagan. Shundan beri AQSh Nevada poligonida yerostida subkritik sinovlar o‘tkazib kelmoqda.

Trampning bayonotiga javoban Kreml matbuot kotibi Dmitriy Peskov shu kunning o‘zida yadroviy qurol sinovlariga oid dunyoda amal qilayotgan moratoriyni eslatdi. Shuningdek, u Rossiya prezidenti Vladimir Putinning moratoriy buzilgan taqdirda «vaziyatga muvofiq harakat qilish» haqidagi ko‘plab bayonotlariga ishora qildi.

Moskva so‘nggi marta 1990 yilda, SSSR davrida yadroviy sinov o‘tkazgan. Rossiya Yadroviy sinovlarni to‘liq taqiqlash to‘g‘risidagi shartnomani imzolagan va ratifikatsiya qilgan, ammo 2023 yilda imzosini qaytarib oldi. Bundan oldin AQSh Rossiyani yadroviy sinovlar moratoriyini buzishda ayblab kelgan.

So‘nggi kunlarda prezident Putin avval cheklanmagan uzoqlikka ega, yadroviy qurilmaga ega «Burevestnik» qanotli raketa, so‘ng yadroviy qurilma o‘rnatilgan suvosti pilotsiz apparat «Poseydon» sinovlari haqida xabar berdi. Shu bilan birga, Rossiya yadroviy qurolning o‘zi sinovdan o‘tkazilganini e’lon qilgani yo‘q. Tramp esa «Burevestnik» sinoviga oid Putin bayonotini «noo‘rin» deb atadi.