«Hamroh» va Xalqaro Migratsiya Tashkiloti migrantlar oilasidan bo‘lgan ayollarni qo‘llab-quvvatlaydi

Memorandum doirasida tomonlar bir nechta asosiy hamkorlik yo‘nalishlarini belgilab oldi. Unga ko‘ra, migrantlar oilasidan bo‘lgan ayol-tadbirkorlarni qo‘llab-quvvatlash maqsadida grant va o‘quv dasturlari orqali moliyaviy manbalarni topish hamda jalb etish yo‘lida hamkorlik qilinadi. 

Shuningdek, ayollarning barqaror daromad manbalarini yaratishiga va iqtisodiy zaiflikni kamaytirishiga xizmat qiluvchi manzilli grant mexanizmlari ishlab chiqiladi va amaliyotga joriy etiladi. Hamkorlik doirasida ayollar o‘rtasida tajriba almashish, o‘zaro o‘rganish va mahalliy biznes uyushmalari bilan aloqalarni mustahkamlashga qaratilgan mentorlik dasturlari tashkil etiladi. Shu bilan birga, qo‘shma tashabbuslarning samaradorligini oshirish maqsadida dasturlar monitoringi va baholash tizimi yo‘lga qo‘yiladi.

«Ayollarning imkoniyatlarini kengaytirar ekanmiz, biz ularni faqat qo‘llab-quvvatlamaymiz, balki oilalarning o‘zgarishi uchun sharoit yaratamiz. Bu oilaviy budjetni oqilona boshqarish, pul o‘tkazmalaridan samarali foydalanish va iqlim o‘zgarishlariga nisbatan uy xo‘jaliklarining bardoshliligini oshirishga xizmat qiladi», dedi Nozimaxon Davletova, Prezidenti Administratsiyasi rahbarining konsultanti – Inson kapitalini rivojlantirish bo‘yicha Loyiha ofisi rahbari.

«Mehnat migrantlari oilasidan bo‘lgan ayollar ko‘pincha ikki karra yukni ko‘taradi. Ular ham oila parvarishi, ham daromad topish uchun mas’ul. IOM bilan hamkorlik orqali biz ularga zarur bilim, vosita va ishonch beramiz, shunda ular oilalari va mahalliy hamjamiyatlar foydasiga barqaror biznes yarata oladi», dedi Dilfuza Nurmatova, «Hamroh» kompaniyasi bosh direktori.

«Ayollarning huquq va imkoniyatlarini kengaytirish — bu butun hamjamiyatlarni mustahkamlashdir. «Hamroh» bilan hamkorligimiz migrantlar oilasidan bo‘lgan ayollarning mamlakat iqlim o‘zgarishlariga moslashish jarayonidan chetda qolmasligini ta’minlaydi», dedi Endryu Grey, IOM O‘zbekiston missiyasi rahbari.

«Hamroh» va IOM o‘rtasidagi hamkorlik iqtisodiy imkoniyatlarni kengaytirish, ijtimoiy jihatdan himoyaga muhtoj jamoalarda yashovchi ayollarni qo‘llab-quvvatlash va ularning mamlakat barqaror rivojlanishiga qo‘shayotgan hissasini kuchaytirishga qaratilgan.

Ma’lumot uchun, «Hamroh» — O‘zbekistonda ayollar tadbirkorligini qo‘llab-quvvatlovchi birinchi kompaniya bo‘lib, ayollarga bepul maslahatlar, mentorlik va o‘quv dasturlari taqdim etadi. Kompaniya imtiyozli kreditlar olishda ko‘maklashadi, ayollarni biznes yuritish ko‘nikmalari bilan qurollantiradi hamda ularning yangi imkoniyatlardan foydalanishiga yordam beradi.

Xalqaro Migratsiya Tashkiloti (IOM) — 1951 yilda tashkil etilgan, Birlashgan Millatlar Tashkiloti tizimiga kiruvchi agentlik bo‘lib, migratsiya masalalari bilan shug‘ullanadi. Tashkilot dunyoning 150 dan ortiq mamlakatida faoliyat yuritadi va 2015 yildan buyon O‘zbekistonda mehnat migratsiyasi, migrantlarni himoya qilish, favqulodda vaziyatlarga javob berish hamda iqlim o‘zgarishiga moslashish sohalarida keng ko‘lamli dasturlarni amalga oshirib kelmoqda.