Markaz Chiroqchi tumani hokimligi va The Stirling Foundation jamgʻarmasi koʻmagida tashkil etildi. U Chiroqchi va unga yaqin hududlarda yashovchi tadbirkor ayollar uchun biznesni rivojlantirishga doir taʼlim, maslahat va murabbiylik xizmatlaridan foydalanish imkoniyatini kengaytirishga qaratilgan.
Bu HAMROHʼning hududlardagi navbatdagi markazi hisoblanadi. Tashkilot bunga qadar Nukusda filial va Chimboyda markaz ochgan.
HAMROH
Chiroqchidagi yangi markazda tadbirkor ayollar biznesni ochish va rivojlantirish, moliyaviy savodxonlikni oshirish hamda moliyalashtirish imkoniyatlaridan foydalanish boʻyicha maslahat olishi mumkin. Shuningdek, ishtirokchilarga biznesning turli bosqichlarida individual hamrohlik va ekspert koʻmagi koʻrsatiladi.
Markaz faoliyatining asosiy yoʻnalishlaridan biri HAMROH tomonidan BMT Taraqqiyot dasturi (UNDP) bilan hamkorlikda amalga oshirilayotgan Womenʼs Entrepreneurship Support Programme (WESP) dasturi boʻladi.
HAMROH
Markazning ochilish marosimida 80 dan ortiq tadbirkor ayol, davlat organlari vakillari, HAMROH jamoasi, murabbiylar va taʼlim dasturlari ishtirokchilari qatnashdi.
Tadbirda Qashqadaryo viloyati hokimi oʻrinbosari - Oila va xotin-qizlar boshqarmasi boshligʻi Ziyoda Aminova, Chiroqchi tumani hokimi Bahodir Xudoyqulov va HAMROH bosh direktori Dilfuza Nurmatova soʻzga chiqdi.
Shuningdek, WESP dasturi murabbiylari, hunarmandlar hamjamiyati vakillari hamda tadbirkor ayollar biznesni rivojlantirish boʻyicha tajriba va amaliy tavsiyalari bilan oʻrtoqlashdi. Tadbir yakunida ishtirokchilar uchun tajriba almashish, hamkorlik istiqbollarini muhokama qilish va yangi kasbiy aloqalar oʻrnatishga qaratilgan netvorking sessiyasi oʻtkazildi.
«Biz uchun har bir yangi markaz, avvalo, tadbirkor ayollar uchun yangi imkoniyatdir. Ayol qayerda yashashi va oʻz biznesini qayerda rivojlantirishidan qatʼi nazar, sifatli qoʻllab-quvvatlashdan foydalanish imkoniyatiga ega boʻlishini istaymiz», - dedi HAMROH bosh direktori Dilfuza Nurmatova.
