Prezident GM rahbari bilan mahsulot turlarini kengaytirishni muhokama qildi

O‘zbekiston prezidenti Vashingtonda General Motors International'ning global ijrochi direktori Shilpan Amin bilan uchrashdi. Mahsulotlar turini kengaytirish va mahalliylashtirishni chuqurlashtirish, zamonaviy mashinasozlik texnologiyalari va xomashyo resurslari sohasida hamkorlik istiqbollari ko‘rib chiqildi.

Foto: Prezident matbuot xizmati

Prezident Shavkat Mirziyoyev Vashingtonga amaliy tashrifining ishbilarmonlik dasturi doirasida “General Motors International” kompaniyasining global ijrochi direktori Shilpan Aminni qabul qildi.

Ushbu korporatsiya bilan uzoq muddatli hamkorlikni yanada kengaytirish masalalari ko‘rib chiqildi. “General Motors International” kompaniyasining O‘zbekiston avtomobil sanoatini rivojlantirish va diversifikatsiya qilishdagi muhim o‘rni qayd etildi.

So‘nggi 5 yil ichida kompaniya tomonidan 1,6 million dona avtomobil ishlab chiqarildi, O‘zbekiston “Chevrolet” brendi uchun AQShdan keyin ikkinchi yirik bozorga hamda Markaziy Osiyo va MDH bozorlarida sotuvlar bo‘yicha yetakchiga aylandi.

Ishlab chiqarish kooperatsiyasini yanada rivojlantirish, mahsulotlar turini kengaytirish va mahalliylashtirishni chuqurlashtirishga alohida e’tibor qaratildi.

Zamonaviy mashinasozlikda talab yuqori bo‘lgan yangi texnologiyalar va xomashyo resurslari sohasida qo‘shma loyihalarni amalga oshirish istiqbollari muhokama qilindi.

Tayyorlagan: Комрон Чегабоев

#AQSh #General Motors #O‘zavtosanoat