Ohangaronda erkak do‘konga qurol bilan bostirib kirib, sotuvchiga tahdid qildi

Qamchiq dovonida erkak miltiq ko‘targan holda savdo do‘koniga bostirib kirdi. Holat 22 oktyabr kuni tunda sodir bo‘lgan. Uning bu qilmishi savdo do‘konidagi kameraga tushib qolgan.

Kun.uz’ga kelib tushgan videolavhada erkak qo‘lida miltiq bilan do‘konga kirib, baqir-chaqir qilgani va qurol bilan shu yerdagi boshqa bir erkakni urgani ko‘rinadi. So‘ngra u “senga kelaman deganmidim”, deya miltiq bilan sotuvchi ayolning bosh qismiga zarba bergan. Keyin u rastadan oshib o‘tib, ayolga tan jarohati yetkazgan.

Kun.uz ushbu shaxs Angren shahrida yashovchi, 1992 yilda tug‘ilgan D.K. ekaniga aniqlik kiritdi. U savdo do‘konidagi sotuvchi ayol – 35 yoshli Sh.N. bilan bilan oldindan tanish bo‘lgan. Erkak o‘rtalarida kelib chiqqan janjal sababli ushbu harakatni sodir etgan.

Kun.uz sotuvchi ayol bilan suhbatlashdi. Sh.N.ning aytishicha, ular oldindan tanish bo‘lishgan.

“Rossiyaga borib ishlab keladi. Turmush qurishni taklif qildi. Avvaliga dadam rozi bo‘lganday bo‘ldi. Ammo uning harakatlarini, qo‘polligini ko‘rib qo‘rqib qoldim va taklifini rad etdim. U Rossiyada ishlab yurganida uy olamiz deya mening kartamga 3,5 ming dollar pul tashlagandi. O‘sha kuni pulni qaytarishimni so‘radi. Xo‘p, kartadan yechib olib, beraman, dedim. Ishda bo‘lganim uchun bunga ulgurmagandim. Yarim tunda miltiq ko‘tarib do‘konimga bostirib keldi. Miltiqning temir qismi bilan boshimga urdi. Og‘ir jarohat oldim. Shifoxonadan kecha chiqdim”, deydi Sh.N.

Ayolning qo‘shimcha qilishicha, holat bo‘yicha Ohangaron tumani ichki ishlar bo‘limi tomonidan surishtiruv ishlari olib borilmoqda. Biroq hamon jinoyat ishi qo‘zg‘atilmagan va D.K. ochiqda yuribdi.

“Aksincha, xodimlar ishni “yopti-yopti” qilishga urinmoqda. Sababi, uning yaqin qarindoshlari “organ”da ishlaydi. Qamoq ehtiyot chorasi qo‘llashmadi, ochiqda yuribdi. Bundan qo‘rqyapmiz. Hatto qizimni bog‘chaga olib borishga ham qo‘rqib qoldim”, deydi u.

Hozircha holat bo‘yicha rasmiy ma’lumot berilmadi.