Frontdagi vaziyat: Rossiya qo‘shinlari Pokrovskdan tashqari yana qayerlarda oldinga siljimoqda
|18:31 / 14.11.202515 2889 min
Pokrovsk-Mirnograd hududida vaziyat murakkabligicha qolmoqda. Ukraina qo‘shinlari qurshov xavfini yo‘qqa chiqarish uchun harakat qilmoqda, Rossiya qo‘shinlari esa hujumni davom ettirmoqda.
Foto: EPAFoto: EPA
Ukraina qurolli kuchlari Pokrovsk shimolidagi Rodinskoye qishlog‘ini qaytarib olishga muvaffaq bo‘ldi, bu esa bu hududda himoyalanayotgan guruhning vaziyatini biroz yaxshiladi, endi Rossiyaning janubdan navbatdagi ehtimoliy hujumining oldini olish uchun Pokrovsk va uning g‘arbiy chekkalarida qarshi hujumga o‘tishgan.
Rossiya qo‘shinlari Pokrovskning janubiy va sharqiy qismlarida hujumni davom ettirmoqda va ukrainlarning quruqlikdagi ta’minot yo‘llarini o‘qqa tutmoqda.
10 va 11 noyabr kunlari e’lon qilingan geolokatsiyalangan kadrlar Rossiya qo‘shinlari Pokrovsk janubi-sharqida va Mirnograd janubi-sharqida biroz oldinga siljiganini ko‘rsatmoqda.
Rossiya qo‘shinlari katta ehtimol bilan Pokrovsk va Mirnogradni egallaydi, ammo Rossiya harbiy qo‘mondonligi frontning boshqa uchastkalaridan bu yo‘nalishga ko‘proq resurslarni yo‘naltirmagani tufayli ko‘proq vaqt talab qildi va ko‘proq yo‘qotishlarga olib keldi, deb hisoblaydi Amerika urushni o‘rganish instituti (ISW) tahlilchilari.
Ammo Rossiya qo‘mondonligi bir vaqtning o‘zida butun harbiy harakatlar maydoni bo‘ylab bir nechta hujum operatsiyalarini o‘tkazishga qaror qildi.
Frontning boshqa uchastkalarida nimalar bo‘lyapti?
Xaritadan ko‘rish mumkinki, hozirda eng faol harbiy harakatlar Xarkiv oblastining shimolidagi Vovchansk hududida va Velikiy Burluk yo‘nalishida; Xarkiv oblasti sharqidagi Kupyansk hududida; Donetsk oblastida «qal’alar kamari»ning shimoli-sharqida Shimoliy yo‘nalishda; Donetsk, Dnipropetrovsk va Zaporijjya oblastlari tutashgan joy yaqinida Velikiy Mixaylovsk yo‘nalishida, shuningdek, Zaporijjya oblastining sharqida Gulyaypole yo‘nalishida davom etmoqda.
Ikki tomondagi manbalar Rossiya qo‘shinlari qator uchastkalarda tumanli ob-havoda ukrain dronlari ojiz qolganidan foydalanib, yashirincha oldinga siljishga erishganini xabar qilmoqda.
«Nisbatan qulay pozitsiyalarga o‘tish»
Ukraina qurolli kuchlari uchun ancha xavotirli vaziyat Zaporijjya oblasti sharqida yuzaga kelmoqda, u yerda Rossiyaning «Vostok» qo‘shinlari guruhi Yanchur daryosini tezda kechib o‘tishga muvaffaq bo‘lgan va Gulyaypole shahriga hujum qilmoqda.
Mavzuga oid
11 noyabr kuni kechqurun Rossiya armiyasi Gulyaypoledan yetti kilometr shimoli-sharqda joylashgan muhim strategik ahamiyatga ega Rovnopile qishlog‘ini egalladi. Ukraina janubidagi mudofaa kuchlari xabarida Rovnopiledan chekinish shaxsiy tarkibni asrash maqsadida «nisbatan qulay marralarga o‘tish» deb izohlangan.
Qo‘shni Sladkoye qishlog‘i ham rus qo‘shinlari tomonidan to‘liq yoki qisman nazorat ostiga olingan. Bundan tashqari, rus qo‘shinlari shimolroqda, Pokrovskoye va Ternovatoye qishloqlari yo‘nalishida ham zarbalar bermoqda.
Gulyaypole – nisbatan kichik shahar bo‘lib, Ukraina inqilobiy isyonchi armiyasi qo‘mondoni Nestor Maxnoning vatani sifatida ham tanilgan. Urushdan oldin Gulyaypoleda 16 mingga yaqin odam yashagan, hozirda u yerdan qolgan aholi evakuatsiya qilingani aytilmoqda.
Ukraina qurolli kuchlarining shahar shimolidagi pozitsiyalarini boy berishi Rossiya qo‘shinlarining operativ kenglikka chiqishi va R-85 yo‘li to‘sib qo‘yilishi tahdidini yuzaga keltiradi, natijada Gulyaypole Pokrovsk bilan bir xil vaziyatga tushib qolishi mumkin.
«Yo‘l kesib qo‘yilishi dushmanning logistika imkoniyatlarini murakkablashtiradi va uni shaharga yangi ta’minot yo‘nalishlarini ochishga majbur qiladi. Rossiya qo‘shinlari esa Zaporijjya oblasti ichkarisiga kirishni osonlashtiradi», – deb yozadi Rossiyaning Rybar telegram-kanali.
Shahar Ukraina qurolli kuchlari mudofaasi uchun ham juda muhim.
«Gulyaypoledan keyin navbat Orixivga keladi, – deb yozadi ukrainalik harbiy sharhlovchi Bogdan Miroshnikov. – Keyin esa Rossiya qurolli kuchlarini Zaporijjyaning janubiy chekkalariga yaqinlashishdan to‘xtatish uchun faqat Kamishevaxa va Stepnogorsk qoladi. Bu Pokrovskoye qishlog‘iga ham ta’sir qiladi. Agar dushman uni ham qo‘lga olsa, Volnyanskkacha bir qadam qoladi. Bu esa dushmanning operativ-taktik muvaffaqiyatlari va haqiqiy falokat bo‘ladi», – deb hisoblaydi u.
Ukrainaning yana bir manbasi DeepState tahliliy portaliga ko‘ra, hozirda rossiyaliklarda to‘g‘ridan to‘g‘ri Gulyaypolega hujum qilish uchun yetarli resurslar yo‘q, ammo ular shaharni shimoldan o‘rab olishni davom ettirishi, uni o‘qqa tutishni kuchaytirishi va logistikani qiyinlashtirishi mumkin.
«Shu bilan birga, Janub mudofaa kuchlarining noqulay pozitsiyalardan uzoqlashish bo‘yicha qabul qilgan qarorlariga e’tibor qaratmoqchimiz. Jamiyat anchadan beri qo‘mondonlikdan eng qimmatli narsa – shaxsiy tarkibni saqlab qolish uchun realistik yechimlarni talab qilib kelgan», – deb yozadi ukrainalik tahlilchilar.
Ukraina shimolidagi vaziyat
Sumi yo‘nalishida pozitsion janglar davom etmoqda. Rossiyaning Kondratovka qishlog‘i yaqinidagi hujumlari va Ukrainaning Vorachino qishlog‘i yaqinidagi qarshi hujumlari haqida xabar berilgan.
Rossiya armiyasi so‘nggi kunlarda Xarkiv oblasti shimolida faollashdi, ular Vovchansk shahri chekkalarida oldinga siljishga muvaffaq bo‘lgan va tasdiqlanmagan ma’lumotlarga ko‘ra, shahar janubidagi Sinelnikov qishlog‘ini egallagan. Ukraina artilleriya batareyasi qo‘mondonining so‘zlariga ko‘ra, Rossiya qo‘shinlari kichik guruhlar bilan «sizib o‘tish» taktikasini qo‘llashda davom etmoqda. Rossiya hujumlari biroz sharqda, Vovchanskaya Xutor qishlog‘i yo‘nalishida ham davom etmoqda.
Rossiyadagi harbiy manbalar Vovchansk hududida harakat qilayotgan Rossiya bo‘linmalari rotatsiya qilingani, bu Ukraina 25 oktyabr kuni Belgorod suv ombori to‘g‘oniga zarba berganidan ko‘p o‘tmay amalga oshirilganini xabar qilgan.
Yana bir uchastkada, Vovchanskdan 40 km janubi-sharqda Rossiya qo‘shini Velikiye Burluki qishlog‘ yaqinida davlat chegarasini kesib o‘tib, Otradnoye va Bologovka qishloqlari oralig‘idagi besh kilometrlik hududni egallagan. ISW baholariga ko‘ra, bu voqea hududni yoki harbiy harakatlar zonasining oldingi qismini nazorat qilishga ta’sir qilmadi.
Qarshi hujumlar
Kupyansk shahri chegarasida va shahar atrofida ham shiddatli janglar davom etmoqda. Tomonlardan birining muvaffaqiyati haqida tasdiqlangan ma’lumotlar yo‘q.
Ukraina qurolli kuchlari Birlashgan operativ guruhi vakili polkovnik Viktor Tregubov 11 noyabr kuni Rossiya qo‘shinlari Kupyanskning shimoliy chekkalarida o‘z pozitsiyalarini saqlab qolishga urinayotganini aytdi va ikki tomonning ham bu hududdagi logistikasi og‘ir ahvolda ekanini ta’kidladi.
Rossiya armiyasi Kupyanskdan janubdagi frontning boshqa ba’zi uchastkalarida – Borovoy, Liman, Seversk, Konstantinovka va Drujkovka yo‘nalishlarida ham hujumlarni davom ettirmoqda.
«Rossiya qo‘shinlari Severskning janubiy chekkasida yangi pozitsiyalarni egallab, Zvanovkadagi nazorat zonasini kengaytirmoqda», – deydi rossiyalik Z-harbiy Semyon Pegov.
Urushni o‘rganish instituti esa Rossiya qo‘shinlari Seversk hududida muvaffaqiyatga erishganini tasdiqlamagan. Aksincha, 11 noyabrdagi kadrlar Ukraina qo‘shinlari shu kunlarda shahar sharqida oldinga siljiganini ko‘rsatgan.
Shu bilan birga, ISW ma’lumotlariga ko‘ra, Rossiya qo‘shinlari Konstantinovkadan janubi-sharqda Ivanopolning sharqiy chekkasida biroz oldinga siljigan.
Pokrovsk va Kupyansk o‘rtasidagi front uchastkalarida tomonlardan birortasining sezilarli muvaffaqiyatlari to‘g‘risida boshqa tasdiqlangan ma’lumotlar yo‘q.
Kartinka muhim
Ukraina bilan urushning katta qismi davomida Rossiya qo‘shinlari bir vaqtning o‘zida turli yo‘nalishlarda hujum operatsiyalarini amalga oshirishda katta qiyinchilikka uchramoqda.
Ammo ISW’ning fikricha, Rossiya qo‘mondonligi Pokrovskka hujumda vaqt va inson resurslarini yo‘qotishga tayyor: ular frontning boshqa har qanday qismidagi faollikning pasayishi Ukraina qo‘shinlariga u yerda muvaffaqiyatga erishish yoki kuchlarni boshqa, muhimroq joylarga ko‘chirish imkoniyatini berishidan xavotirda.
Bundan tashqari, Rossiya generaliteti nafaqat Pokrovsk yo‘nalishida, balki butun harbiy harakatlar teatri bo‘ylab Rossiya qo‘shinlarining sezilarli darajada oldinga siljishi manzarasini saqlab qolishi kerak.
Pokrovsk mudofaasini tezda yakson qilish uchun frontning boshqa uchastkalaridan kuch va vositalarni olib kelish esa Rossiyaning bu pozitsiyasiga putur yetkazishi mumkin, deb yozadi ISW.
