Beninda ham harbiy to‘ntarish amalga oshirildi

Fransiyaning Benindagi elchixonasi xabarida aytilishicha, prezidentning Kotonu shahridagi (poytaxt emas) qarorgohi hududida otishma ovozlari eshitilgan. Elchixona Fransiya fuqarolarini xavfsizlik nuqtayi nazaridan o‘z uylarini tark etmaslikka chaqirgan.

O‘zlarini «Qayta qurish bo‘yicha harbiy qo‘mita» deb atagan harbiylar davlat televideniyesi orqali chiqishida maxsus yig‘ilish o‘tkazilgani va unda «Patris Talonni respublika prezidenti lavozimidan chetlatish» to‘g‘risida qaror qabul qilganini ma’lum qildi.

Biroq Talon yaqinlari prezident xavfsiz joyda ekanini aytmoqda.

«Bu faqat televideniyeni nazorat qilayotgan kichik bir guruh. Muntazam armiya nazoratni tiklamoqda. Shahar va mamlakat to‘liq xavfsizlikda», – deyiladi prezident ofisining AFP agentligiga bergan izohida.

67 yoshli Talonning ikkinchi vakolat muddati 2026 yil bahorigacha, navbatdagi prezidentlik saylovlari aprel oyida bo‘lib o‘tishi kerak edi.

Talon – Beninda «paxta qiroli» sifatida mashhur bo‘lgan yirik tadbirkor hisoblanadi. U 2016 yilgi saylovlar natijasida hokimiyatga kelgandi. Talon uchinchi muddatga saylanmaslikka va’da bergan va o‘z vorisini ham ma’lum qilgandi.

G‘arbiy Afrikaning ushbu davlatidagi to‘ntarish qo‘shni Gvineye-Bisauda prezident Umaro Sissoko Embalo hokimiyatdan ag‘darilganidan o‘n kuncha vaqt o‘tib sodir bo‘lmoqda.

G‘arbiy Afrikada so‘nggi yillarda bir necha bor davlat to‘ntarishlari amalga oshirildi, xususan, Burkina-Faso, Gvineya, Mali va Nigerda harbiylar hokimiyat tepasiga keldi, bu esa mintaqada xavfsizlik bilan bog‘liq vaziyat og‘irlashishi borasidagi xavotirlarni kuchaytirdi.