Dori sifati nazoratida Yevropa, AQSh va Yaponiya farmakopeyalari uslubi qo‘llanishi mumkin

O‘zbekistonda dori vositalari sifati ustidan nazoratni xalqaro standartlarga yaqinlashtirish maqsadida, davlat farmakopeyasida sinov usuli ko‘rsatilmagan holatlarda Yevropa, AQSh, Yaponiya kabi yetakchi farmakopeyalar metodlaridan foydalanish tartibi joriy etiladi. Bu tartib tegishli nizom loyihasida belgilangan.

Foto: RIA Novosti

Loyihaga ko‘ra, dori vositalari sifati birinchi navbatda O‘zbekiston davlat farmakopeyasi talablari asosida baholanadi. Agar kerakli sinov usuli davlat farmakopeyasida mavjud bo‘lmasa, Yevropa farmakopeyasi, AQSh farmakopeyasi, Yaponiya farmakopeyasi hamda Jahon sog‘liqni saqlash tashkilotining xalqaro farmakopeyasida qayd etilgan metodlardan ustuvorlik tartibida foydalanishga ruxsat beriladi.

Bunday usullar dori vositalarini ro‘yxatdan o‘tkazish va qayta ro‘yxatdan o‘tkazish jarayonida Farmakopeya qo‘mitasining ilmiy va ekspert kengashi xulosasi bilan normativ hujjatlarga kiritiladi. Tanlangan xorijiy metodlar mahalliy sharoitda qo‘llashdan oldin laboratoriya sinovlari va validatsiyadan o‘tkazilishi shart.

Hujjatda ta’kidlanishicha, ishlab chiqaruvchi korxonalar tomonidan taklif etilayotgan ichki (in-house) sinov usullari ham, agar ular aniqlik va ishonchlilik bo‘yicha xalqaro farmakopeyalardagi standartlardan kam bo‘lmasa, belgilangan tartibda tasdiqlanib, normativ hujjatlarga kiritilishi mumkin.

Nizom loyihasi dori vositalari muomalasi bilan shug‘ullanuvchi barcha korxona va tashkilotlar uchun majburiy hisoblanadi, veterinar dori vositalari va dorixona shartlarida tayyorlanadigan dori preparatlariga esa tatbiq etilmaydi.

Tayyorlagan: Отабек Матназаров

#farmatsevtika #dori